СЕ ПОДГОТВУВААТ НОВИ ПРОПИСИ ЗА ВЕЛОСИПЕДСКА ИНФРАСТРУКТУРА Николоски вети и субвенции за купување велосипеди

Mинистерството за транспорт најавува дека ќе подготви нови прописи со кои се уредува планирање, проектирање, изградба и одржување на велосипедска инфраструктура во населено место и надвор од него. При подготовка на овие прописи ќе учествуваат и претставници на граѓанското здружение „Биди Зелен”,

Ова било договорено на средбата на министерот за транспорт Александар Николоски и претставници на стручните служби од секторот за урбанизам и патен сообраќај со претставници на граѓанското здружение „Биди Зелен”.

Како што соопшти Министерството, на средбата е потврден фактот од недостаток на инфраструктура за велосипеди како услов за безбеден сообраќај од една страна, но и како еден од главните фактори за намалување на аерозагадувањето.

„Николоски ја поздрави оваа иницијатива и истакна дека Министерството е подготвено со заедничка соработка со граѓанските здруженија да се креираат нови нормативи и стандарди со цел во иднина квалитетно би се планирала и би се реализирала вело-инфраструктурата.

Исто така, Николоски ја истакна подготвеноста на Министерството во следната буџетска година да се предвидат и средства за субвенции за купување на нови велосипеди со цел да се намали користење автомобили и да се влијае врз намалување на аерозагадувањето како мерка за заштита на животната средина.

Министерот ги повика општините, во рамките на финансиската поддршка за општините од 250 милиони евра планирана за следната година, општините да аплицираат за проекти за изградба на велосипедски патеки со цел да се подигне квалитетот на вело-инфраструктурата на општинско ниво и да се поттикне користење велосипеди во урбаните средини.