СЕ ЧЕКА ЗЕЛЕНО СВЕТЛО ЗА ДА СЕ ПУШТИ СТРУЈАТА Аеродром, дел од Центар и Гази Баба и натаму без електрична енергија
Дел од Аеродром, Лисиче, Ченто, Кванташки пазар, Трубарево и Арачиново останаа без електрична енергија поради превентивно исклучени далекуводи.
Попладнево изби голем пожар на депонијата Вардариште, кој предизвика сериозни проблеми со снабдувањето со електрична енергија во источните делови на Скопје.
Од Дирекцијата за заштита и спасување (ДЗС) информираа дека поради опасноста пожарот да се прошири надвор од депонијата, на терен се испратени еден БТР, еден хермелин и тим на спасувачи како помош на скопската Противпожарна бригада.
– Наши екипи се на терен за да помогнат во локализирање на пожарот и спречување на негово ширење. Безбедноста на граѓаните и инфраструктурата е наш највисок приоритет – ни изјави директорот на ДЗС, Стојанче Ангелов.
Од ЕВН Македонија објаснуваат дека од безбедносни причини превентивно бил исклучен далекуводот што ги снабдува трафостаниците „Аеродром“ и „Исток“, по барање на Противпожарната бригада.
– Оваа мерка беше неопходна за да се овозможи безбедно гаснење на пожарот и да се спречат поголеми дефекти на мрежата. Нашите екипи се веќе на терен и подготвени за интервенција, но чекаме официјално одобрение за повторно вклучување на далноводите – велат од ЕВН за Плусинфо.
Дел од Аеродром, Лисиче, Методија Андонов – Ченто, Кванташки пазар, индустриската зона, Арачиново, Стајковци, Трубарево и Бунарџик останаа без струја. Од ЕВН најавуваат дека снабдувањето ќе биде нормализирано веднаш штом пожарот биде ставен под контрола.