СЕ БАРА ПРИТВОР ЗА 26-ГОДИШНИКОТ КОЈ СЕ ЗАКАНУВАШЕ ДЕКА Е ПОДМЕТНАТА БОМБА НА СКОПСКИОТ АЕРОДРОМ Го признал делото во полиција, ќе одговара за тероризам
Осомничениот со својата постапка создал чувство на страв и несигурност кај патниците и другите присутни на аеродромот, а воедно со активирање на протоколите за антитерористичка проверка го пореметил и севкупниот воздушен сообраќај, велат од ОЈО.
Обвинителството поведе истрага за лицето кое на 16 август телефонски се заканувало дека е подметната бомба на аеродромот во Скопје. За осомничениот е побаран притвор. Според соопштението на ОЈО ГОКК, лицето се јавило на линијата 192 за итни случаи во раните утрински часови и тврдело дека бомбата е поставена на лет од Скопје за Анталија.
Веднаш по приемот на заканата од страна на Секторот за борба против тероризам, насилен екстремизам и радикализам биле активирани протоколите за антитерористичка проверка и по неколкучасовна проверка е утврдено дека станува збор за лажна пријава.
„Осомничениот со својата постапка создал чувство на страв и несигурност кај патниците и другите присутни на аеродромот, а воедно со активирање на протоколите за антитерористичка проверка го пореметил и севкупниот воздушен сообраќај“, велат од ОЈО.
За случајот се огласи и Министерството за внатрешни работи. За осомничениот 26-годишник С.А. е поднесена пријава за кривично дело тероризам.
Полицијата вели дека е претресен неговиот дом. Во полициска станица тој го признал делото.