СЕ БАРА ИТЕН ТРАНСПОРТ ДО ВИЕНА Австриски пожарникар повреден во Беровско
Пожарникарот е во стабилна состојба и е хоспитализиран на Клиниката за трауматологија во Скопје. Нема оштетување на нервите, нема потреба од операција, вели директорот на Дирекцијата за заштита и спасување, Беким Максути.
Австриски пожарникар е повреден при гаснењето на огнената стихија во Малешевијата. Станува збор за 53-годишен пожарникар кој од почетокот на минатата недела учествувал во деноноќната битка со огнената стихија која го зафати источниот дел, пеплосувајќи ги „белите дробови“ на земјата, пишува Дојче веле.
– Пожарникарот има скршен пршлен и посериозни повреди со коишто се здобил вчера при акцијата за гаснење на пожарите во беровскиот регион – вели во изјава за ДВ директорот на Дирекцијата за заштита и спасување, Беким Максути, кој денеска го посетил повредениот пожарникар за да се информира за неговата здравствена состојба.
Пожарникарите од Австрија се придружувани и од два лекарски тима, коишто веднаш му укажале помош на повредениот, по што му била пружена помош и од македонските лекари.
– Пожарникарот е во стабилна состојба, пружена му е помош и е хоспитализиран на Клиниката за трауматологија во Скопје. Се прават напори да се обезбеди негов итен транспорт за Виена. Нема оштетување на нервите, нема потреба од операција. Засега препораката е да мирува – вели Максути.