Сара Џесика Паркер мора на суд, ја тужи поранешна вработена

Поранешна вработена во продавницата за чевли на холивудската актерка Сара Џесика Паркер, Хедер Холт, тврди во тужбата што ја поднела до Врховниот суд во Њујорк дека актерката и нејзиниот деловен партнер Џeорџ Малкемус не ѝ го исплатиле прекувременото работно време во  периодот од 31 декември 2018 година па сѐ до 1 март 2020 година.

„На тужителката не ѝ се соодветно компензирани прекувремените часови за сите часови што ги одработила над тие четириесет во работната недела“, стои во тужбата каде не е спомнато за колкав паричен износ станува збор.

Хедер Холт од Сара Џесика Паркер бара надомест на платите, како и камати и парични казни.

– Сите во Њујорк заслужуваат да бидат платени за времето што го одработиле. Кршењата на законот за плати се сериозни и секој работодавец што ги прекрши треба да одговара за тоа, дури и познатите луѓе како неа – изјавил адвокатот на Хедер.

Инаку, Сара Џесика има две продавници во Њујорк, како и по една во Лас Вегас, Мериленд, Дубаи, Абу Даби и Канада.