Самоубиствена Дилема Со Мециновиќ и дали вреди бесата на Вреди?

И тука доаѓа тишината. Вреди, кој во Скопје нуди поддршка без потреба, во Кичево молчи. Зошто? Затоа што таму етничката матрица не им одговара. Иако Јовановски има Албанка за сопруга, тоа не е доволно за да се пробие етничкиот ѕид на калкулации.

Од Методија Анѓелкоски Објавено 21/10/2025 18:43:59

Методија Анѓелкоски, Фото: Приватна архива

Пред две недели ми стигнаа првите закани како колумнист од некој Високо Образован Лик, слободно доделете му абревијација, за колумната „Cartago delenda est – или СДСМ мора да падне“. Ликови кои читаат само наслови – игнорирам, па така и овој – каква и да му дадовте абревијација или акроним. Колумната беше опомена за односот на СДСМ кој си пукаше во колено со отворањето на темата – промена на устав, тема заради која изгубија на избори – непосредно пред другите избори!

И кога веќе сме кај абревијација, сега СДСМ веќе не стои за „Социјалдемократски сојуз на Македонија“, туку стои за Самоубиствена Дилема Со Мециновиќ: да се поддржи ли оној кој чекор по чекор им го презема кормилото во бродот наречен „Опозиција“? Ако молчат, Левица со огромно задоволство ќе го прогласи нивниот молк за „тајна поддршка на власта“, со веќе познатата абревијација „СДСМ-ДПМНЕ“, а и со насмевка под мустаќ на Апасиев, кој е исплашен од популарноста на Мециновиќ. Ако пак го поддржат Мециновиќ, се стремат кон дефинитивно исчезнување од политичката сцена и нивна комплетна замена со Левица. Ги води ли омразата кон ВМРО-ДПМНЕ и попустливоста кон ЕУ кон Еутаназија?

Вреди продава ветер во магла

„ВЛЕН“ (или Вреди) пружа рака кон ВМРО-ДПМНЕ, за да му помогне на Орце Ѓорѓиевски во вториот круг да го освои градоначалничкото место за град Скопје. Орце освои 91.000 гласа во Скопје – трипати повеќе од второпласираниот Мециновиќ. Но, бидејќи имаше четворица противкандидати (Бакиу, Шукова, Реџепи) кои се движат во рамките од 1-2% разлика, Орце остана под прагот од 50% и оди во втор круг. Коалицијата на власт, „принципиелно“ понуди поддршка. И некако сите замолчеа за апсурдот. А апсурдот е очигледен: ако Бакиу не се кандидираше, Орце ќе беше градоначалник уште во првиот круг. ВМРО-ДПМНЕ отстапи од поставување кандидати во Струга, Тетово и во Гостивар за да даде директна поддршка на Вреди, но Вреди реши дека треба да ги удави скопјани уште две недели во отпад – за да покаже дека е тука. Сега, кога на Орце не му треба никој во вториот круг, освен да ги замоли своите да излезат, „спасот доаѓа“ од Бакиу… Извинете, ама оваа понуда е политички еквивалент на „мадиња за бубрези“ – симболична, задоцнета и непотребна. Поддршка таму каде што не е потребна, само за да се симулира коалициска лојалност. Арно ама – има загатка во Кичево.

Кичево: најгласно молчење

Можеби ќе ве интересира

Некој со некого навистина „избриша патос“!

Златко Теодосиевски 21/10/2025

ОД ТАПАНАРKA НА ХЕВИ МЕТАЛ БЕНД ДО ПРЕМИЕРKA НА ЈАПОНИЈА…

плусинфо 21/10/2025

Во Кичево, Александар Јовановски од ВМРО-ДПМНЕ освои 44,5% – единствен Македонец во трката, со реална шанса за победа. Тројцата албански кандидати се движат околу 5.000 гласа секој, а во втор круг влегуваат Јовановски и Дехари од ДУИ.

И тука доаѓа тишината. Вреди, кој во Скопје нуди поддршка без потреба, во Кичево молчи. Зошто? Затоа што таму етничката матрица не им одговара. Иако Јовановски има Албанка за сопруга, тоа не е доволно за да се пробие етничкиот ѕид на калкулации. Вреди воопшто не вреди и не нуди коалициска верност или достоинствен договор. На Вреди му вреди само етничка припадност.

Стапот има два краја

Вреди е коалициски партнер на ВМРО-ДПМНЕ, но нивниот кандидат Билал Касами често кокетира со неофашистички и антимакедонски реторики. За секој просечен гласач на ВМРО-ДПМНЕ, тоа е горчлива пилула. Партијата е принудена да им каже на своите гласачи дека „оној со необалистичките изјави е помало зло од оној кој се прогласи за албански газда на Македонија“ – што е, во македонската литература познато како „угоре високо, удолу длабоко“. Верувам дека Македонците ќе бидат фер и сепак ќе го изберат своето „помало зло“, но упатувам апел до Мицкоски – ако Вреди реши да брани „албанска енклава“ во Кичево, да ги прогласи за вишок во Владата. Просто – ако има партнерство, треба да има и доверба во две насоки. Дванаесет илјади кичевчани го кажаа своето! Александар е нивниот избор и Вреди ќе вреди само ако го почитува тоа.

Весела Математика

Не знам за вас, но мене ми се допаѓа симпатичниот детинест оптимизам на чупето што се одзива на името Ана. За потпретседателката на СДСМ, овој срамен пораз на СДСМ бил супер, затоа што СДСМ победи во долгогодишниот бастион – Крива Паланка. Трендовите биле одлични. Еден познат и искусен македонски новинар во негов стил би рекол „Не се спремни соросоидите да ја остават СДСМ. Ја освоија – нивна си е“.

Некако склопија весела математика во која две баби и три жаби се седум мачки. Барем пет да беа. ВМРО-ДПМНЕ изгубило 137.000 гласа од лани до сега, споредувајќи парламентарни избори на целата територија со локални во кои ВМРО-ДПМНЕ нема листи во 18 општини. Споредија со трикови и црна магија дисипација од 131 политички субјект на локални избори – со единаесет субјекти на парламентарни. Споредија избори на кои се доаѓа и гласа од дијаспора, со такви на кои не се гласа. Супер… Да им текнеше да споредат со вториот круг на претседателските избори, на кој Гордана Силјановска освои 561.000 гласови, ќе можеа сосема слободно да кажат „што има врска што 131 субјект е заменет со два субјекти, важно е дека власта изгуби 260.000 гласа“. Дури тогаш трендовите ќе беа како да излегле од култниот филм на Тарантино „Pulp Fiction“.