САМО НАРОДИ ШТО НЕМААТ СВОЕ, ПОСЕГААТ ПО ТУЃО Г.г Стефан проповеда дека до вистината не се доаѓа со отстапки од своите национални и историски посебности

Православните христијани во земјава денеска го слават Рождеството Христово-Божик. Во сите храмови на Македонската православна црква изутринава се одржуваа божикни литургии. Централното одбележување беше одржано во соборниот храм „Свети Климент Охридски“ во Скопје, каде архиепископот охридски и македонски г.г. Стефан  богослужеше литургија на Св.Василиј Велики.

По повод Божик, г.г. Стефан заедно со Светиот архиерејски синод на Македонската православна црква-Охридска архиепископија, до свештенослужителите, монаштвото и до сите верници, упати божикно послание во кое им пожели мир и благослов од Бога, поздравувајќи ги со величествениот торжествен поздрав – Христос се роди!

– Од нас, како од македонски народ, држава и црква, во ова време преполно со искушенија, се бара поголема грижа и дополнителна внимателност при решавањето на наметнатите прашања, коишто во последно време некои ги исправија пред сите нас. Да внимаваме, зашто никогаш и никаде не се дошло до вистината со отстапки од своите духовни, национални, историски и културни посебности. Само народи коишто немаат свое, посегаат по туѓо. Затоа никој и пред никого, нема право да се откажува од она коешто, како дар божји и како сенародно наследство, им припаѓа и на поколенијата пред нас, како и на оние по нас. Ниедна привремена добивка не е достојна замена за последиците што можат да произлезат од загубата на она што нè прави посебен народ, на ова парче македонска земја, дарувано од Бога и зачувано со безбројните жртви на нашите предци. Честитајќи ви го Божик, на сите чеда на Македонската православна црква, овде во татковината и насекаде по светот, ви посакуваме мир и изобилни дарови од новородениот богомладенец, поздравувајќи ве со радосниот поздрав: Христос се роди – меѓу другото истакна поглаварот на МПЦ ОА.