САКАТЕ ДА ВЕ ЗАКОПААТ ДО ЏИМ МОРИСОН ИЛИ ДО СИМОН ДЕ БОВОАР? Париз отпочна уникатна лотарија за гробно место до познати личности!

Системот вклучува 634.000 парцели, но да се биде погребан во близина на култниот американски музичар и поет Џим Морисон или до познатата француска писателка Симон де Бовоар – досега беше само сон, бидејќи историските гробишта се полни од почетокот на 20 век. Сепак, овие места, поради својата историска вредност, не смеат да бидат уништени, па затоа, Градското собрание на Париз нуди на лотарија 30 места и споменици: 10 во „Пер Лашез“, 10 во „Монпарнас“ и 10 плацеви во „Монмартр“. Условот е да се реставрира соодветниот историски споменик.

– Како знак на интерес, првите 24 часа имавме 1.000 кликања на формуларите за аплицирање. Доколку не се исполнат условите за реставрација и купување, продажбата на споменикот се откажува, а купувачот ја губи својата инвестиција – изјави Пол Симондон, заменик на градоначалничката на Париз, Ан Идалго, задолжен за погребни прашања.

Кандидатите притоа, мора „да имаат сертификати од специјализирани компании за сечење камен за да покажат дека се свесни за трошоците за реновирањето“, за да нема изненадувања, се вели во изјавата.

Механизмот за реставрација им овозможува на семејствата да предвидат купување на место за погребување во рамките на градот за првпат, според Симондон. Оваа лотарија – прва од ваков вид, е тест, а Градскиот совет размислува за проширување на програмата – со што до израз ќе дојдат и „еколошките придобивки“ од овој потфат.