САКАМЕ ДА УЧИМЕ! Средношколките во Авганистан излегоа на протест, си ги бараат правата

Тринаесет храбри авганистански средношколки протестирале во градот Херат, борејќи се против Талибанците кои ги спречуваат девојчињата да посетуваат училиште.

Нема талибанци во соседството во предградието на Херат каде се одржал протестот, а собирот го следеле неколку локални новинари кои биле поканети, пишува АП, пренесува Ало.

Учесничките на протестот држеле транспаренти на кои пишува дека сакаат да одат на училиште и дека со забрана на образованието на девојчињата, целата идна нација ќе биде необразована.

– Бараме од талибанците да ги отворат нашите училишта што е можно поскоро – рече 17-годишната Нагрис Jaмшид.

Портпаролот на Талибанците рече дека нема планови за отворање училишта за девојчиња во блиска иднина, а во Авганистан расте стравот дека може да се врати строго правило од деведесеттите години кога беше воведена слична забрана.

– Бараме сите девојки да се вратат во своите училишта и на сите жени да им биде дозволено да се вратат на работа – рече Шарара Сарвари која има 18 години.

Во неделата, на вработените жени во владата во Кабул им беше кажано да останат дома, а работата им е дозволена само на оние што не можат да бидат заменети со мажи.

Во петокот, авганистанското Министерство за образование предводено од Талибанците им нареди на момчињата од 6 до 12 одделение да се вратат на училиште, почнувајќи од сабота, заедно со наставниците кои се мажи. Во соопштението не се споменува ништо за враќање на девојчињата во училиштата.