САД ПОНИШТИЈА ВИЗИ НА ЛУЃЕ ШТО СЕ ИСМЕВАА СО СМРТТА НА ЧАРЛИ КИРК Трамп му додели постхумен Претседателски медал на слободата

САД поништија визи на повеќе странски државјани поради изјави поврзани со атентатот врз десничарскиот активист Чарли Кирк, соопшти Стејт департментот.

Визи се укинати за државјани на Германија, Мексико, Аргентина, Јужна Африка, Бразил и на Парагвај. Стејт департментот наведе дека визите се укинати поради нивните онлајн коментари по повод смртта на Кирк.

„Германски државјанин ја прослави смртта на Кирк и се обиде да го оправда неговото убиство, пишувајќи „кога фашистите умираат, демократите не се жалат. САД немаат обврска да бидат домаќини на странци кои им посакуваат смрт на Американците“ објави Стејт департментот на мрежата Икс и најави дека ќе продолжи да ги идентификува носителите на визи кои „го прославија гнасниот атентат“ врз Кирк.

A Paraguayan national charged that “Charlie Kirk was a son of a b**** and he died by his own rules.”

Visa revoked.

— Department of State (@StateDept) October 14, 2025

Кирк беше застрелан на настан на Универзитет во американската сојузна држава Јута на 10 септември. Смртта на истакнатата конзервативна политичка и медиумска фигура имаше големо политичко влијание во САД.

Стејт департментот во септември предупреди дека странските државјани би можеле да се соочат со одземање на визи доколку го оправдаат нападот врз Кирк.

Американскиот претседател Доналд Трамп вчера постхумно го одликуваше Кирк со највисокото цивилно признание во САД – Претседателскиот медал на слободата.

Кирк требаше да наполни 32 години на денот на церемонијата.

Неговата сопруга Ерика Кирк ја прими наградата во негово име, во градината на Белата куќа.

Трамп го нарече Кирк „вистински американски херој“, истакнувајќи дека неговата организација „Турнинг Поинт УСА“ прераснала во најголемата конзервативна младинска група во земјата.

– Неговото име засекогаш ќе биде впишано меѓу вистинските херои на Америка – рече Трамп, нарекувајќи го „маченик за вистината и слободата“.

Ерика Кирк одржа емотивен говор.

– Седум и пол години барав совршен подарок за роденденот на Чарли, но сега со сигурност можам да кажам, господине претседателе, дека му го подаривте најдобриот подарок што можеше да го добие – рече вдовицата.

Кирк, кој на 18 години ја основа „Турнинг Поинт УСА“ во 2012 година, беше познат по промовирањето конзервативни вредности и  по поддршката за Трамп. Неговите критичари го обвинуваа за ширење расистички, хомофобични и сексистички ставови.

Дваесетгодишниот студент Тајлер Робинсон е обвинет за неговото убиство и се соочува со смртна казна ако биде осуден.