САД ГО ВРАЌААТ СТРЕЛАЊЕТО ЗА ИЗВРШУВАЊЕ НА ФЕДЕРАЛНАТА СМРТНА КАЗНА Се враќа и електричната столица, се воведува задушување со азотен гас

Министерството за правда на САД објави планови за забрзување на спроведувањето на федералните смртни казни, како и за проширување на методите на егзекуција, кои покрај протоколот за смртоносна инјекција, ќе вклучуваат стрелачки одреди, електрична столица и задушување со гас.

Одлуката означува пресврт на политиката на администрацијата на поранешниот претседател Џо Бајден за постепено оддалечување од употребата на смртна казна на федерално ниво. Тоа е крајот на неговиот мораториумот на федералната смртна казна и исполнувањето на ветувањето на претседателот Доналд Трамп за зајакнување на примената на смртната казна.

Главниот двигател на овие промени е долгогодишната тешкотија во добивањето лекови за смртоносни инјекции, кои досега беа примарен метод на егзекуција. Фармацевтските компании, делумно поради забраните од Европската Унија, одбиваат да ги продаваат своите производи на затворските системи во САД. Поради ова, федералните власти, следејќи го примерот на некои американски држави, одлучија да го прошират протоколот.

Извештајот на Министерството за правда му наложува на Бирото за затвори да го измени својот протокол за да „вклучи дополнителни, уставни средства за егзекуција што моментално ги обезбедуваат законите на поединечните држави“.

Заедно со повторното воведување на стрелањето и електрокуцијата, додаден е нов метод на задушување со азотен гас, кој Алабама прва го користеше во 2024 година. Администрацијата, исто така, го одобри протоколот за смртоносна инјекција со еден лек, пентобарбитал, кој беше користен за време на 13 федерални егзекуции во последните месеци од првиот мандат на Трамп.

„Оваа промена ќе помогне да се осигури дека Министерството е подготвено да извршува законски егзекуции дури и ако одреден лек не е достапен“, се вели во извештајот.

Покрај проширувањето на методите, Министерството, исто така, објави „поедноставување на внатрешните процеси за забрзување на случаите на смртна казна“. Планира да донесе правила што ќе го скратат процесот на федерални жалби и ќе ја ограничат можноста на осудените лица да бараат помилување.

Вршителот на должноста државен обвинител Тод Бланш остро ја критикуваше претходната администрација велејќи дека одлуките од ерата на Бајден „предизвикале неопислива штета на жртвите на криминалот и на самото владеење на правото.

Администрацијата на Бајден воведе мораториум на федералните егзекуции во 2021 година, а претседателот Бајден помилува 37 од 40-те затвореници осудени на смрт, оставајќи само тројца осудени на смрт. Администрацијата на Трамп сега го укина тој мораториум и наводно одобри смртна казна за 44 обвинети, од кои деветмина Бланш веќе лично ги одобрил.

Федералните егзекуции беа суспендирани речиси две децении пред Трамп да ги врати во 2020 година. Најновите потези дополнително ја зајакнуваат таа политика.

Иако Врховниот суд на САД пресуди дека методите како што се стрелање и електрокуција не ја кршат уставната забрана за „сурово и необично казнување“, поддршката за смртната казна се намалува кај американската јавност. Според анкетата на Галуп, поддршката за смртната казна за осудени убијци паднала од 80 проценти во 1994 година на 52 проценти во 2025 година.

Пет американски држави моментно дозволуваат егзекуции со стрелачки одред за осудени криминалци кои ги исцрпиле сите правни лекови. Во март, човек осуден за двојно убиство беше егзекутиран во Јужна Каролина со стрелање, што беше четврта таква егзекуција во САД од 1970-тите.

Вршителот на должноста државен обвинител Тод Бланш изјави дека претходната администрација не успеала во својата должност.

„Претходната администрација не успеа во својата должност да го заштити американскиот народ со тоа што одби да спроведе и да изврши најстроги казни против најопасните криминалци, вклучувајќи терористи, убијци на деца и убијци на полицајци. Под водство на претседателот Доналд Трамп, Министерството за правда повторно го спроведува законот и стои на страната на жртвите“ вели Бланш.

Министерството додаде и дека за време на мандатот на Бајден, Министерството за правда поништило голем дел од работата извршена под првата администрација на претседателот Доналд Трамп во врска со проширувањето на извршувањето на смртната казна во федералните случаи.