САД ЌЕ ЌАРАТ, САМО ЕУ Е ГУБИТНИК ВО РЕЦЕСИЈАТА Вашингтон пост објаснува како кризата ќе влијае на побарувачката на енергија
Рецесијата во Европа би ја намалила побарувачката за енергија и за други производи, а за возврат ова ќе ги намали ценовните шокови во САД. Меѓутоа, ако Москва одлучи да не продава нафта, гас и други енергенси на земјите кои ќе воведат капак на цената на овие енергенси, тогаш овој потег би можел да предзивика рецесија во САД.
Претставниците на Белата куќа веруваат дека ефектот од рецесијата во ЕУ врз американската економија би бил „скромна“, додека некои економисти сугерираат дека тоа всушност ќе ѝ помогне на Америка, објави Вашингтон пост повикувајќи се на извори кои барале да останат анонимни. Рецесијата во Европа би ја намалила побарувачката за енергија и за други производи, а за возврат ова ќе ги намали ценовните шокови во САД.
– Ако Европа оди во рецесија, очигледно ќе има помала побарувачка за широк спектар на производи. Овде сме во таква перверзна ситуација (што) тоа всушност може да биде позитивно – изјави Дин Бејкер, ко-основач на Центарот за економски и политички истражувања, за Вашингтон пост.
Меѓутоа, тука во играта влегува Русија. Ако Москва оди уште подалеку и престане да ја продава нафтата и гасот не само на ЕУ, туку и на другите пазари, како одговор на предложеното ограничување на цената на нејзиниот увоз на енергија, тоа „би ја загрозило американската економија повеќе“ од европската рецесија, барем така велат пресметките на хартија. Ваквиот потег на Москва би можел да ги раскара САД и ЕУ и нивните политики оваа зима.
– Ова ќе ја турне (американската) економија во рецесија. Цените на бензините ќе се искачат до небото, над рекордните пет долари за галон речиси преку ноќ. Економијата не може да свари пет долари за галон, тоа би било огромно покачување – предупреди Марк Занди, економист во Moody’s Analytics.
Зборот рецесија буквално значи застој на економијата, односно економија без раст. Рецесијата обично доаѓа како последица на висока инфлација или друг вид економска криза. Европските банки веќе ги зголемија каматите за 0,75 поени, а првиот човек на Дојче Банка неодамна изјави дека рецесијата во Германија ќе биде неизбежна.
За разлика од Германија, САД не се толку загрижени. Тие навистина можеби ќе ќарат од ситуацијата. Еден висок член на администрацијата на Бајден изјави за весникот дека Министерството за финансии и Советот на економски советници процениле дека влијанието врз САД од таков настан најверојатно ќе биде „скромно и податливо“.
Трговијата со Европа сочинува помалку од 1 отсто од бруто домашниот производ на САД, додека земјата исто така има доволно сопствен природен гас за да го минимизира влијанието од евентуалното прекинување на руското снабдување со енергија во ЕУ, посочува весникот.