САД ДА НЕ СЕ МЕШААТ ВО ВНАТРЕШНАТА ПОЛИТИКА НА ГЕРМАНИЈА Мерц и Трамп ќе разговараат по телефон
Новиот германски канцелар Фридрих Мерц, најави дека ќе се обиде да ја врати довербата кај гласачите што ѝ припаѓаат на АфД, која во моментов е најсилна опозициска сила во Бундестагот. Според него, и покрај тоа што партијата е означена како екстремистичка од разузнавачката служба, проблемот не е решен. Канцеларот смета дека е потребен подлабок политички одговор на растот на крајната десница.
Новиот германски канцелар Фридрих Мерц синоќа ја повика администрацијата на претседателот на САД, Доналд Трамп, да се „држи понастрана“ од внатрешната политика на Германија, откако неколку американски функционери ѝ дадоа поддршка на крајно десничарската партија АфД.
Најавувајќи дека утре ќе го има својот прв телефонски разговор со Трамп, новиот германски лидер изјави за телевизијата ЗДФ (ZDF) дека сака да „ја охрабри и да ја повика американската Влада да ја остави внатрешната политика на Германија да остане внатрешно прашање и да се држи подалеку од партиските политички размислувања“.
Американскиот потпретседател, Џ.Д. Венс, и државниот секретар, Марко Рубио, во петокот остро ја критикуваа одлуката на германската разузнавачка служба БфД (BfD) да ја класифицира партијата АфД како екстремистичка десничарска организација, подложувајќи ја на зголемен владин надзор.
Мерц рече дека сака да „направи сè“ за да ја „поврати довербата“ кај сегашните гласачи во крајно десничарската АфД, која добива на сила и сега е прва опозициска група во Бундестагот.
Тој, исто така, рече дека со неодамнешната класификација на партијата од страна на разузнавачката служба како „екстремистичка десничарска“, фундаменталниот проблем „не е решен“.
Во своето прво интервју откако стана канцелар, Мерц, исто така, изрази значителна загриженост за ситуацијата во Газа и го повика Израел, каде што ќе оди неговиот министер за надворешни работи, да „ги почитува своите хуманитарни обврски“.
– Израел има право да се брани од Хамас, но треба да остане и земја што ги почитува своите хуманитарни обврски – рече Мерц.
Тој додаде дека „ова е особено важно во Појасот Газа, каде што се води страшна војна на место каде што е потребно да се води конфликт со терористите на Хамас“.
Мерц рече дека неговиот нов министер за надворешни работи, Јохан Вадефул, ќе оди во Израел на крајот од неделата.