Ружин: Предизвик беше да се развие онлајн решение за толку кратко време

Координаторката за развој на Националната платформа за учење од далечина Александра Ружин, на денешната прес-конференција истакна дека платформата е креирана во услови на глобална пандемија, но со цврста определба истата да остане и да претставува цврста основа за интегрирање на останатите процеси од образовниот систем.

– Да се дизајнира и развие онлајн решение кое ќе биде функционално и стабилно, и кое ќе биде модифицирано и имплементирано во реално време од над 26.000 наставници во спроведување на наставата на над 250.000 ученици во над 1.000 училишта е исклучително комплексен и динамичен процес кое во денешно време е дури и премногу амбициозно – вели координаторката.

Ружин рече дека водени од јасната цел со одлично подготвениот план, како и уште поодличниот тим успеале за овој краток период да ги постават основите, да пронајдат решенија и да дизајнираат систем и да го подготват за имплементација почнувајќи од новата учебна година.

– Имплементацијата ќе биде проследена со бројни ризици и предизвици и свесни сме за истите, па ќе се потрудиме да одговориме на сите во реално време и да го прилагодиме решението, не само на околностите кои се присутни на терен, туку исто така да го задржиме и концептот. Платформата ги зближи академијата и јавниот сектор и е резултат на една егземпларна соработка меѓу МОН и ФИНКИ и која треба да се развива и негува во иднина – изјави Александра Ружин.