📷 РУСИЈА СО МАПА ОДГОВОРИ НА ДОГОВОРОТ ГЕРМАНИЈА-УКРАИНА „Ова се целите, спијте мирно“

Руското Министерство за одбрана на Телеграм објави список на европски компании кои што наводно произведуваат дронови за Украина и ги означи како потенцијални цели, пренесува рускиот опозициски медиум „Медуза“.

Листите биле објавени на 15 април. Во нив се наведени имиња и адреси на компании од повеќе европски градови. Меѓу нив се Лондон, Минхен, Рига, Вилнус и Прага.

Вториот список вклучува компании од Мадрид, Венеција и Хаифа. Интересно е што една адреса во Минхен се покажала како станбена зграда.

Објавата ја коментираше и поранешниот руски претседател и актуелен претседател на Советот на Безбедност на Русија.

„Ова е листа на потенцијални цели за руските вооружени сили. Спијте мирно, европски партнери“, напиша на социјалната мрежа Икс Дмитриј Медведев.

Тој порача дека идните чекори ќе зависат од развојот на ситуацијата.

Објавата доаѓа веднаш по дипломатски активности во Берлин. Украинскиот претседател Володимир Зеленски и германскиот канцелар Фридрих Мерц договорија нов пакет за одбрана вреден 4 милијарди евра.

Според договорот, Германија ќе финансира договор за купување на неколку стотици ракети за системите за воздушна одбрана „Патриот“. Исто така, Германија и Украина договорија заеднички да произведуваат дронови.

Договорот Зеленски го нарече „една од најголемите зделки од овој тип“, пишува Ројтерс. Украина ќе дава знаење од фронтот, додека Германија ќе финансира и ќе обезбеди индустриски услови.

Еуроњуз напиша дека во првата фаза е планирано производство на 50.000 летала.

На средбата беа претставени модели на дронови од заеднички компании.

Руските власти за својата објава тврдат дека има информативна цел. Според нив, граѓаните треба да ги знаат причините за безбедносните ризици. Воедно, се наведува дека станува збор за компании поврзани со украинската воена индустрија. Листите се претставени како дел од поширок наратив за конфликтот.