РУСИЈА НЕ СЕ ОТКАЖУВА ОД ВЕНЕЦУЕЛСКАТА НАФТА Москва ѝ праќа студена порака на Америка
Компанијата ќе продолжи доследно да ги исполнува своите обврски во тесна координација со своите меѓународни партнери, давајќи приоритет на одржливиот развој на заеднички проекти за производство на нафта и инфраструктура, се вели во соопштението на руската државна компанија „Росзарубежнефт“.
Руската државна компанија „Росзарубежнефт“ објави дека нема намера да се повлече од своите нафтени проекти во Венецуела, и покрај новите изјави на Доналд Трамп дека САД ќе ја преземат контролата врз извозот на венецуелска нафта.
Одлуката е потврдена преку агенцијата ТАСС, со јасна порака:
„Нашите средства се стекнати под пазарни услови и се во сопственост на руската држава“.
Москва не попушта, Каракас останува партнер?
Од компанијата појасниле дека ќе продолжат да ги исполнуваат обврските во соработка со своите меѓународни партнери.
„Компанијата ќе продолжи доследно да ги исполнува своите обврски во тесна координација со своите меѓународни партнери, давајќи приоритет на одржливиот развој на заеднички проекти за производство на нафта и инфраструктура“, се вели во соопштението.
Русија и Венецуела соработуваат во енергетскиот сектор уште од 2008 година, преку заеднички проекти во Петрозамора и Петромиранда. И покрај американските санкции, Москва досега не се повлекла ниту од еден нафтен проект во Латинска Америка.
Трамп ја отвора новата „нафтена линија“
Доналд Трамп, кој повторно има силно влијание во Белата куќа, побара новите власти во Каракас да ги прекинат врските со Русија и Кина.
– Американските компании треба да го обноват нафтениот сектор во Венецуела – изјави Трамп на конференција за енергетска безбедност во Хјустон.
Но, рускиот одговор дојде веднаш. Од Росзарубежнефт порачаа дека ќе ги прошират заедничките проекти со венецуелската страна, засновани на „еднаквост, меѓусебно почитување и заштита на инвестициите“.
Кинеските танкери се пишманија
Два кинески танкери, кои требаше да подигнат пратка сурова нафта во Венецуела, го прекинаа своето патување и се враќаат во Азија. Кина, која е најголемиот увозник на венецуелска нафта, не добила никакви пратки од државната нафтена компанија на Венецуела од декември, поради ембаргото на САД.
Танкерите „Ксингје“ и „Таузанд Сани“ беа закотвени во Атлантикот со недели, чекајќи понатамошни инструкции поради политичката криза во Венецуела и поморската блокада на САД. Тие се дел од флота од три супертанкери кои транспортираат нафта исклучиво помеѓу Кина и Венецуела.