РОБОТСКА ЕРА ВО ТРАНСПЛАНТАЦИЈАТА НА ОРГАНИ Помали засеци, помала болка и побрзо враќање во секојдневието

Последниве години, брзиот развој и на медицината и на технологијата во Турција доведе до воведување сосема нови апликации во хируршките техники, од кои едната е роботска хирургија. Наведувајќи дека роботската хирургија денес се користи и при трансплантација на органи, проф. д-р Хамди Каракајали, супервизор на Центарот за трансплантација на органи во болницата „Атакент“ на Универзитетот „Аџибадем“, нагласува дека тоа дава многу важни придобивки и за пациентот, за донаторот и за хирургот што ја изведува трансплантацијата на органи. Проф. д-р Хамди Каракајали даде важни излагања за нивото што е постигнато во трансплантацијата на органи и роботската трансплантација на органи изведена со напредна технологија.

Некои се преродени, некои продолжуваат да живеат со ново лице, нозе и раце. Според податоците објавени од Министерството за здравство во ноември минатата година, 24.449 пациенти се на листите на чекање за трансплантација на бубрег, 2.600 за трансплантација на црн дроб, 1.422 за трансплантација на срце, 277 за трансплантација на панкреас, 204 за трансплантација на бели дробови и 4.119 за трансплантација на рожница, со надеж дека ќе се „вратат во живот“ и ќе си го повратат здравјето со дониран орган.

Додека Турција бавно напредува во донирањето на кадаверични органи, таа е на врвот на светската листа во трансплантација на органи од жив донор. Супервизорот на Центарот за трансплантација на органи во болницата „Аџибадем Атакент“, проф. д-р Хамди Каракајали, вели:

– Турција е една од најискусните земји во светот во однос на трансплантација на органи од жив донор. Од тие причини, многу пациенти од странство доаѓаат во нашата земја за да добијат можност за лекување, а лекари од многу земји во светот доаѓаат во нашата земја и во нашите центри за трансплантација на органи заради обука, за да ги набљудуваат и научат овие операции. Турција станува сè попосакувана не само затоа што ги има најискусните лекари, туку и затоа што има болници со одлична инфраструктура и опрема што ги користи најновите технолошки достигнувања.

Напредната технологија го дополнува медицинското искуство!

Развојот на полето на медицината во Турција и неверојатниот напредок во технологијата како дополнување на искуството на лекарите донесоа иновации во хируршките техники во последниве години кои беа незамисливи во минатото. Нагласувајќи дека денес дури и исклучително тешки и сложени операции можат да се изведат за многу пократки временски периоди, со помал ризик од крварење, многу побезбедно за пациентот и поудобно за хирургот, а може да се добијат многу подобри резултати, проф.д-р Каракајали објаснува:

– На пример, лапароскопските (затворени) операции речиси 20 години се рутинска процедура при трансплантација на органи, особено кај операции на донори на бубрези, што резултира со пократок престој во болница, помала болка и подобри козметички резултати за донаторите на бубрези. Како резултат на предностите на оваа метода при трансплантација на органи, како и кај други хируршки интервенции, операциите на приматели при трансплантација на бубрег кај некои одбрани пациенти, а од неодамна дури и операциите на донатори при трансплантации на црн дроб почнаа да се изведуваат со затворен метод. Благодарение на сѐ поголемото искуство и технологијата која постојано се развива, овој метод станува применлив и во операциите на приматели при трансплантација на црн дроб.

Роботската хирургија доаѓа до израз последниве години

Наведувајќи дека едно од најважните технолошки достигнувања во областа на медицината во последниве години е воведувањето роботска хирургија, проф. д-р Хамди Каракајали додава:

– Роботската хирургија, која има широка примена особено во уролошките, гинеколошките и гастроинтестиналните операции, почна да го зазема своето место во трансплантацијата на органи. Иако зголемувањето на трошоците е важен ограничувачки фактор, треба да се нагласи дека има значителни предности во споредба со лапароскопската хирургија.

Тродимензионални наместо дводимензионални снимки

Значи, кои се разликите меѓу трансплантацијата на органи со роботска и лапароскопска хирургија? Супервизорот на Центарот за трансплантација на органи, проф. д-р Каракајали, ги сумира разликите:

– Кај лапароскопската хирургија, хирургот ја изведува операцијата со помош на камера и инструменти вметнати во абдоменот, придружени со 2-димензионална снимка, кај роботската хирургија операцијата се изведува со 3-димензионална и зголемена снимка со висока резолуција. Притоа, мобилноста на хируршките инструменти поставени во абдоменот е многу поголема, што го олеснува изведувањето на операцијата на контролиран и безбеден начин.

Големи придобивки и за примателот и за донорот и за хирургот

Роботската хирургија не значи дека операцијата ја изведува само роботот. Рацете на роботот само ги изведуваат движењата на хирургот што го користи роботот. Користењето на сите овие технолошки достигнувања во областа на медицината, особено во хирургијата, има само една цел – да се изведе операција која е побезбедна, со помалку компликации и помал ризик од крварење.

На тој начин се скратува престојот во болница на пациентот, пациентот чувствува помала болка, хируршките засеци се многу помали и пациентот може порано да се врати на работа и социјалниот живот. Проф. д-р Каракајали вели:

– Од друга страна, бидејќи органот се отстранува од донорот без никакво оштетување, тој веднаш почнува да функционира кога ќе се пресади кај примателот, а процесот на закрепнување на примателот е непречен и пократок.