РЕВОЛУЦИОНЕРНО ОТКРИТИЕ НА РУСКИТЕ НАУЧНИЦИ Создадоа гел за брзо зараснување на рани, дури и оние од огнено оружје
Лекот кој сѐ уште е во развој, ќе биде ефикасен за пациенти со долготрајни рани кои не се лекуваат, како и рани од огнено оружје и шрапнели, а можно е да биде пуштен во производство од 2030 година.
Научниците од Рускиот истражувачки институт за клиничка и експериментална лимфологија (НИКЕЛ) развија антибактериски гел за брзо зараснување на рани, вклучително и рани од огнено оружје и шрапнели, соопшти денеска овој научен институт.
– Истражувачите развија прототип на лек базиран на антибактериски пептидомиметик и инертен полимер гел за третман на заразни лезии на кожата и на поткожното ткиво. Производот ефикасно ги уништува патогените бактерии и промовира побрзо зараснување на раните – изјави Павел Мадонов, раководител на одделот за експериментална фармакологија во НИКЕЛ.
Тој објасни дека научниците во гелот го вовеле синтетичкиот антимикробен пептидомиметик KAMP-1, кој е антибактериска компонента на која микроорганизмите тешко развиваат отпор.
– Принципот на дејство на антибактерискиот пептидомиметик е тоа што се прилепува на бактериската мембрана и доведува до нејзина смрт. Антимикробниот пептидомиметик е ефикасен против различни патогени, меѓу кои и габите Кандида – рече Мадонов.
Истражувањата покажаа дека гелот со пептидомиметик обезбедува антибактериска санитација на површината на раната и во соседните слоеви на дермисот без значителна апсорпција во системскиот крвоток. Ова значи дека лекот не покажува висока токсичност.
Таков антимикробен гел може да биде потребен во хирургијата и при третман на заразни кожни лезии. Лекот во развој ќе биде ефикасен за пациенти со долготрајни рани кои не се лекуваат, како и рани од огнено оружје и шрапнели, забележува научниот институт.
Според прелиминарните прогнози, пуштањето на овој лек во производство е можно во 2030 година.