РЕГИСТРИРАН ПРВИОТ СЛУЧАЈ НА „ФЛУРОНА“ Израелка заразена со грип и коронавирус

Првиот случај на „флурона”, односно истовремена зараза со коронавирус и грип, е забележан во Израел.

Локалните медиуми известуваат дека пациентката е млада трудница со благи симптоми, која моментално е примена во болницата Беилинсон во градот Петах Тиква, јави Индепендент.

– Ѝ беа дијагностицирани грип и коронавирус веднаш штом пристигна – изјави професорот Арнон Вижницер, директор на Одделот за гинекологија во болницата, за локалниот весник Хамодија, додавајќи дека двата теста се вратија позитивни, дури и откако повторно ги провериле резултатите.

– Болеста е истата болест; тие се вирусни и предизвикуваат отежнато дишење бидејќи и двете го напаѓаат горниот респираторен тракт – додаде тој.

Израелското министерство за здравство соопшти дека го проучуваат случајот за да утврдат дали комбинацијата од двете инфекции може да предизвика посериозно заболување.

Вижницер додаде дека трудницата не била вакцинирана против коронавирус или грип, но немала особено силни симптоми. Таа се чувствува добро и се очекува да биде пуштена од болница во четврток, јави Њузвик.

Ова е прв документиран случај на истовремена инфекција со коронавирус и вирус на грип, но здравствените експерти веруваат дека имало и други кои не се документирани.

Бројот на случаи на зараза со коронавирус во Израел е во пораст. Секој ден се евидентираат околу 2.300 нови случаи, пренесува Ројтерс.

Се проценува дека околу 92,3% од израелското население примило две дози од вакцината.

И покрај високата стапка на вакцинација, податоците на Ројтерс покажуваат дека Израел е четврта земја во Азија и на Блискиот Исток по бројот на случаи на ковид во однос на популацијата. Пред Израел се Бахреин, Малдиви и Грузија.

Ерусалим пост претходно објави дека расте бројот на заболени од грип во Израел. Израелскиот центар за контрола на болести (ИЦДЦ) објави дека 280 пациенти со грип биле хоспитализирани до 11 декември.