РАСПОРЕДУВАЊЕ НУКЛЕАРНО ОРУЖЈЕ ВО ФИНСКА ЌЕ СЕ СМЕТА ЗА ВОЕНА ЗАКАНА Русија најавува контрамерки

Распоредувањето нуклеарно оружје во Финска ќе претставува закана за Русија и затоа во одговор Москва ќе преземе соодветни мерки, изјави денеска портпаролот на Кремљ, Дмитриј Песков.

Коментирајќи ја најавата на финската Влада Песков рече дека факт е дека Финска ѝ се заканува на Русија со распоредување нуклеарно оружје на нејзина територија, објавија руските медиуми.

– А ако Финска ни се закани, ние ќе преземеме соодветни мерки – изјави Песков.

Финска претходно соопшти дека планира да ја укине долгогодишната забрана за распоредување нуклеарно оружје на нејзина територија, придружувајќи им се на своите скандинавски соседи во потегот што би можел да ја отвори вратата за распоредување атомски бомби на финско тло во време на војна.

Финскиот закон за нуклеарна енергија од 1987 година забранува увоз, производство, поседување и детонирање нуклеарни експлозивни направи на нејзина територија, клаузула за која некои Финци велат дека е корисна само за Русија ако некогаш избувне војна.

Земјата пред две години се приклучи на НАТО како одговор на целосната инвазија од страна на нуклеарно вооружената Русија врз Украина.

– Промената е неопходна за да се овозможи воената одбрана на Финска како дел од алијансата и да се искористи максимално од одвраќањето и колективната одбрана на НАТО – изјави финскиот министер за одбрана Анти Хаканен на прес-конференција.

Предложената промена ќе биде поднесена во парламентот, каде што десничарската коалициска влада има мнозинство.

Сојузниците од НАТО Франција и Германија во понеделникот објавија планови за продлабочување на соработката со европските партнери во нуклеарното одвраќање, што означува промена во политиката додека континентот се соочува со растечки закани од Русија и нестабилност поврзана со конфликтот со Иран.

РУСИЈА ГРАДИ НОВИ ГАРНИЗОНИ НА ГРАНИЦАТА СО ФИНСКА Подготовки за можен конфликт со НАТО