РАБОТНИЦИТЕ СЕ ПЛАШАТ ДА ГИ ПРИЈАВАТ ГАЗДИТЕ За прекршените права доставуваат анонимни пријави
Сојузот на синдикати излазе со извештај дека најголем број од пријавите се поврзани со платите.
Работниците во земјава намногу го користат анонимното пријавување на прекршување на нивните права и речиси 62 отсто од вкупниот број на пријави за прекршени работнички права биле анономни. Најголем дел од пријавите биле во врска со плата, прекувремена работа, право на минимална плата, надоместоци и придонеси од плата, покажуваат податоците од апликацијата ССМ – мои работнички права.
– Од податоците може да се види дека најголем број пријави или 61 отсто биле во врска со плата, прекувремена работа, право на минимална плата, надоместоци, додатоци и придонеси од плата, 18 отсто во врска со нарушено право на годишен одмор и право на регрес за годишен одмор, 12 отсто се во врска со промена на договорите за вработување, престанок на работен однос, 5 отсто се во врска со безбедност и здравје при работа и четири проценти биле во врска со правата на синдикалниот претставник и колективното преговарање – велат од Сојузот на синдикати на Македонија.
Во однос на тип на пријави во најголем дел или 63 отсто се жалби, 22 отсто се за прекршоци и 15 отсто се барања.
– 59 отсто од пријавите се затворени и по истите веќе е постапено од страна на ССМ или Државниот инспекторат за труд, а 29 отсто од пријавите се во процедура, а 12 отсто се отворени и за нив се чекаат дополнителни информации од работниците во врска со прекршувањата на нивните права од работен однос – нагласуваат од ССМ.
Согласно статистиката од апликацијата ССМ – мои работнички права, пријавите се во 87 отсто од вработени, а 13 отсто од нив се од невработени лица или лица на кои им бил прекинат работниот однос.
Сојузот на синдикатите потсетува дека врз основа на предлозите на работниците за потребата од поголема достапност за овозможување бесплатна правна заштита воведе нова алатка, ССМ – мои работнички права која претставува прва мобилна апликација преку која работниците и граѓаните им се овозможува преку користење на своите мобилни телефони да пријават прекршување на работничките права до Сојузот на синдикатите на Македонија.
Апликацијата нуди можност за пријавување на прекршено право за себе и за друго лице, анонимно пријавување, директна комуникација со претставници на ССМ, како и следење на вести и совети од ССМ.