ПУТИН ОТКРИ ШТО ЌЕ БАРА РУСИЈА НА ПРЕГОВОРИТЕ Безбедносни гаранции и нова рамка за Европа

Рускиот претседател Владимир Путин изјави дека идните преговори за завршување на војната во Украина треба да се фокусираат на безбедносните гаранции за двете земји и на поширока рамка за европската безбедност. Во интервју за руската телевизија, еден ден по средбата со специјалниот претставник на американскиот претседател, Стив Виткоф, Путин потврди дека Русија е подготвена следниот месец да ги продолжи преговорите со Украина со посредство на САД.

Тој го повтори долгогодишниот став на Кремљ дека Русија не сакала да започне војна, но дека наишла на непријателски реакции од Украина во врска со клучните прашања што ја засегаат Москва.

– Разговорите за различни прашања би можеле да доведат до позитивен исход – рече Путин, нагласувајќи дека Русија останува фокусирана на постигнување решение за завршување на конфликтот, а не на краткорочно примирје.

– Целта на тие разговори е да се обезбеди безбедноста на Украина и Русија по постигнувањето на мировните договори во нивната конечна форма, а не врз основа на привремено примирје за краток период. Подготвени сме да ги продолжиме тие контакти за да ја постигнеме таа цел – рече Путин.

Рускиот претседател изјави дека Виткоф, исто така, нагласил оти разговорите треба да се прошират и да ја опфатат „целата архитектура на европската безбедност“.

– Се согласувам со тоа. Ќе видиме како ќе се развиваат работите во наредните денови – додаде Путин.

Говорејќи за можните разговори за територијалните прашања во источна Украина, Путин рече дека мора да се земе предвид фактот дека, според неговото тврдење, станува збор за „историски руска земја“.

Тој додаде дека жителите на таа област гласале за приклучување кон Русија на референдумите одржани седум месеци по почетокот на руската инвазија.

– Мојот став по тоа прашање е дека тоа не е нивна територија. Тоа е територија на историска Русија – рече Путин.