📽 ПУТИН ГИ ПОКАНИ САД НА МАЛ ЕКСПЕРИМЕНТ Русија да го пушти „Орешник“ во Киев, а Западот да ја пресретне ракетата со својата одбрана
Рускиот претседател, Владимир Путин, потенцира дека ако некои земји претставуваат закана за Русија, таа има право да користи нуклеарно оружје против нив.
Рускиот претседател, Владимир Путин, изјави дека е подготвен за мал експеримент, поточно „дуел“ помеѓу Русија и САД. Во експериментот, тој ќе ја пушти ракетата во Киев, а западната противвоздушна одбрана треба да ја пресретне.
Рускиот претседател, Владимир Путин, ја одржува својата традиционална годишна конференција. Руските гледачи веќе со денови испраќаат прашања до Путин, а темите се движат од домашни проблеми, како што се поскапувањето и здравствената заштита, до глобални прашања.
Запрашан за „Орешник“ – новата руска балистичка ракета употребена против Украина во ноември – Путин инсистира на тоа дека западната технологија нема шанси да ја пресретне.
– Ајде да одржиме експеримент или дуел. Изберете цел во Киев, донесете ја западната противоздушна одбрана таму и видете дали ќе може да ја пресретне (ракетата „Орешник“). Тоа ќе биде интересно за нас – рече тој.
Путин претходно рече дека оружјето, кога се користело во Украина минатиот месец, патувало со 2,5-3 километри во секунда (10 пати поголема од брзината на звукот), додавајќи дека „во моментот не постои начин да се спротивстави на ова оружје“.
„Победата е сè поблиску“
Потоа следуваше прашање за војната на Русија во Украина или, како што ја нарекува Кремљ, специјалната воена операција. Путин беше прашан дали победата е блиску.
Тој рече дека ситуацијата драстично се менува и дека руските војници секојдневно заземаат територии.
– Војната е сложена, но ние сме сè поблиску до решавање на нашите примарни задачи на специјалната операција – нагласи тој.
Путин зборуваше за бригадата чиешто знаме стоеше зад него. Тој рече дека бригадата се бори во Курската област, а нејзините членови ги нарече херои и им посака победа.
„Нема воена смисла Украина да влезе во регионот Курск“
Во дополнителните прашања од гледачите Путин рече дека не може да постави датум кога Русија ќе ја врати контролата врз регионот Курск по украинската офанзива на почетокот на оваа година.
На рускиот претседател му беа поставени неколку прашања, меѓу кои: кога ќе се ослободи регионот, кога жителите ќе може да се вратат во своите домови, дали инфраструктурата ќе се обнови и дали граѓаните ќе бидат ставени на списокот за помош за обнова на уништените домови во борбите.
– Нема воена смисла Украина да влезе во регионот Курск – посочи тој, додавајќи дека тие мора безбедно да се отстранат. Тој предупреди дека ако се преземе јавна обврска за датум, војниците ќе се обидат да го исполнат и по цена на својот живот.
– Сè ќе се изгради. Во тоа нема дилема. Ќе се обноват и училишта, и градинки, и патната инфраструктура – најави тој и додаде дека сите, чиишто домови се уништени, ќе добијат отштета.
„Не знам дали Западот ја доби пораката“
До Путин беше упатено и прашање за промена на нуклеарната доктрина. Минатиот месец Путин одобри промени што поставуваат нови услови под кои Русија ќе размисли за користење на својот нуклеарен арсенал. Доктрината сега вели дека нападот на ненуклеарна држава, доколку е поддржан од нуклеарна сила, ќе се третира како заеднички напад врз Русија.
Тој беше прашан дали Западот ја доби пораката. „Не знам, прашајте ги нив“, одговара Путин. Тој вели дека ако некои земји претставуваат закана за Русија, таа верува дека има право да користи нуклеарно оружје против нив.
Се очекува Путин да зборува за она што Кремљ сè уште го нарекува специјална воена операција. Останува уште еден месец до враќањето на Доналд Трамп во Белата куќа, па Путин би можел да го искористи овој настан за да испрати порака до новата американска администрација. Тој може да се осврне и на падот на Башар ал-Асад, неговиот близок сојузник.