ПУТИН Е СПРЕМЕН ДА ГИ ПОВЛЕЧЕ РУСКИТЕ СИЛИ ОД НЕКОИ УКРАИНСКИ ТЕРИТОРИИ? Услов е да го добие целиот Донбас
„Владимир Путин потврди дека руската страна е сè уште подготвена да ги направи отстапките што ги направи во Анкориџ. Со други зборови, дека ‘Донбас е наш’“, објави „Комерсант“.
Рускиот претседател Владимир Путин им рекол на некои од водечките руски бизнисмени дека е отворен за размена на дел од територијата контролирана од руските сили во Украина, но дека го сака целиот Донбас, објави весникот „Комерсант“.
Андреј Колесников, дописник од Кремљ за „Комерсант“, еден од водечките руски весници, рече дека Путин ги информирал водечките бизнисмени за деталите од планот на состанокот во Кремљ доцна во ноќта на 24 декември.
„Владимир Путин потврди дека руската страна е сè уште подготвена да ги направи отстапките што ги направи во Анкориџ. Со други зборови, дека ‘Донбас е наш’“, објави „Комерсант“. Во суштина, Путин го сака целиот Донбас, но надвор од таа област „не е исклучена делумна размена на територии од руска страна“, напиша Колесников во весникот.
Украинскиот претседател Володимир Зеленски, завчера изјави дека делегациите на Украина и САД се приближиле кон финализирање на план од 20 точки на разговорите за време на викендот во Мајами. Но, Зеленски рече дека Украина и САД не се согласиле со барањата Украина да ги отстапи деловите од Донбас што сè уште ги контролира. Важна точка на мировниот план, за која нема согласност е и иднината на нуклеарната централа Запорожје, која сега е контролирана од руските сили.
Зеленски денеска изјави дека средба со американскиот претседател Доналд Трамп ќе се случи „во блиска иднина“, навестувајќи дека постои напредок во разговорите за ставање крај на речиси четиригодишната војна меѓу Русија и Украина.