ПРВА ВО СВЕТОТ Куба започна вакцинација на деца на возраст од две години

Кубанската влада започна да вакцинира деца на возраст од две и повеќе години против коронавирусот, во обид да ги отвори училиштата што е можно поскоро, објавија островските медиуми.

Други земји, исто така, најавија дека наскоро ќе започнат со вакцинација на децата, но се верува дека Куба е првата што им дава вакцини против ковид-19 на малите деца. Во Хавана во септември беше кажано дека нивните вакцини се безбедни за децата, пренесува Си-Ен-Ен.

За време на пандемијата, училиштата главно не работеа и децата гледаа часови на телевизија, бидејќи домашниот интернет е реткост во оваа земја.

За време на пандемијата, Куба разви своите вакцини против коронавирусот, за кои нивните научници велат дека се безбедни и ефикасни. Владата, исто така, објави дека ќе побара одобрување од Светската здравствена организација за нејзините вакцини.

Според кубанското Министерство за здравство, повеќе од четири милиони Кубанци се целосно вакцинирани. Владата не соопшти колку деца се вакцинирани досега, но рече дека кампањата за детска вакцинација започнала оваа недела во провинцијата Сиенфуегос каде здравствениот систем е во криза поради недостаток и наглиот скок на нови случаи на инфекција и починати.

Кубанската влада, исто така, рече дека се надева дека ќе вакцинира повеќе од 90 проценти од 11,2 милиони луѓе пред да ги отвори меѓународните граници во средината на ноември.

Првично, владата рече, целта беше да се вакцинираат здравствените работници, постарите лица и најтешко погодените области. По зголемувањето на бројот на инфекции кај децата, кои најверојатно се резултат на делта сојот, владата објави дека приоритет сега ќе биде вакцинирањето на младите луѓе.

– Со скокот на позитивните случаи на ковид-19 кај децата, неопходно е да се заштитат семејствата, поради што ќе ги заштитиме нашите деца и адолесцентите – вели главниот епидемиолог д-р Франциско Дуран Гарсија.

Куба досега пријави 6.056 смртни случаи од коронавирусот, но официјалните лица неодамна рекоа дека бројот може да биде поголем.