Протест против висококатници и нови жители во Ѓорче Петров
Граѓаните бараат средба со министерот за транспорт и врски Благој Бочварски и го повикуваат да не ги одобрува ДУП-овите.
Граѓанската иницијатива против урбаното дивеење денеска во Ѓорче Петров одржа протест против градење десетици висококатници предвидени со деталните урбанистички планови од Општината.
Граѓаните со возила го блокираа кружниот тек во населба Ѓорче Петров половина час во знак на револт против 20-тина ДУП-ови кои Општината планира да ги донесе во текот на годинава.
– Во паркот во Ѓорче Петров се предвидени 15 згради со висина до 33 метри. Во Јурија се предвидени околу 20 згради со висина од 60 метри. Има висококатници спроти пазарот во Ѓорче, во Хром има 100 нови згради. Кај паркот во Ѓорче се предвидени 1.300 нови жители, во Јурија околу 4.000 нови жители, во Хром исто така – изјави Горан Костов од иницијативата.
Тие бараат средба со министерот за транспорт и врски Благој Бочварски и го повикуваат да не ги одобрува ДУП-овите. Ако не ги сослуша, ќе бараат помош од премиерот Зоран Заев, а најавија дека ќе организираат и нови протести.