ПРОТЕЧЕ ВОДА НИЗ ЦЕВКИТЕ, СКОПЈАНИ НАСКОРО ЌЕ ДОБИЈАТ ВОДА Заврши санацијата, 160 стручњаци успешно ги поправија дефектите
Претпријатието упати голема благодарност до сите вработени, кои беа вклучени во овој зафат и вложија максимални напори и труд.
Полнењето на главната водоводна цевка почна и се очекува притисокот да се стабилизира за неколку часа, соопшти јавното претпријатие „Водовод и канализација“.
„Акцијата започна денеска, 21 декември, сабота, во раните утрински часови, кога сите екипи на секторите ЕОК, Механизација и Водовод почнаа со празнење на магистралниот водовод на предвидените локации. Операција се движи во рамки на предвиденото и се очекува да заврши во предвидениот рок, со вкупно време од помалку од 15 часа, во кои најмногу време се одвојува за празнење и полнење на магистралниот водовод“, соопшти „Водовод и канализација“.
Со оваа модернизација, со репарација на 6 сегменти каде во изминати децении се нотирани огромни загуби на вода, се подобрува водоснабдувањето и притисокот во општите Ѓорче Петров и Карпош, се додава во соопштението.
„Со затварањето на главниот градски цевковод од Ф1600 милиметри по должина на линијата на потегот од кружниот тек во Ѓорче Петров до раскрсницата на булеварот Партизански одреди со улицата Никола Парапунов веќе нашиот тим ги заврши интервенциите“, соопшти претпријатието.
– По должина на траса по Партизанска од кружен тек Ѓорче Петров до хотел Карпош се променети 5 воздушни вентили и 5 затварачи за истите на Ф 200, поврзани на цевководот Ф1600.
– Реконструиран е затварач Ф 700 на булевар Партизански одреди со улицата Никола Парапунов..
– Променет е затварачот на Ф400 на кружниот тек Порта Влае.
– Реконструиран е затварачот Ф600 на мостот Обединети Нации.
– Реконструиран е затварач Ф500 на улица Никола Парапунов.
– Во овој момент во фаза на завршување е последната постапката за реконструкција на затварач Ф700 на улицата Никола Парапунов, која се изведува независно од останатите и за која не е неопходно затворање на главниот довод.
„Согласно Оперативниот план за санација на затварачите на градска водоводна линија Ф1600мм, Сектор Водовод со ангажирани повеќе од 160 стручно вработени, меѓу кои ВКВ водоинсталатери, инженери, оператори и возачи на специјални возила, ВКВ автомеханичари, ВКВ машинобравари, ВКВ механичари, ВКВ електричари, работници за дијагностика на дефекти и техничари кои ја вршат работата на терен и уште толку административни лица заедно со директорот ги подготовија и ги завршуваат, согласно планот за постапување со механизација, алат и пумпи. Во време кога половина населени места во Македонија, токму поради ненавремена санација на водоводите, со денови и недели граѓаните немаат вода, а особено во летните месеци, нашиот тим, согласно сложен детален оперативен план, успешно го решава еден од критичните децениски проблеми со кој воедно се подобрува водоснабдувањето и притисокот во општите Ѓорче Петров и Карпош“ се додава во соопштението.
Претпријатието упати голема благодарност до сите вработени, кои беа вклучени во овој зафат и вложија максимални напори и труд.
„Апелираме до сите јавни чинители да ги поддржат нашите вработени во оваа исклучително тешка акција која бара високо ниво на стручност и техничка подготвеност, а воедно и до јавноста да не потпаѓа под изнесувањето информации од нестручни лица со цел да се предизвика страв и паника кај граѓаните“, додава „Водовод“.
ИЈЗ денеска издаде препораки до граѓаните да не ја пијат веднаш водата откако ќе дојде, туку прво добро да ја испуштат од сите чешми.