ПРОСЕЧНА ВОЗРАСТ НА ПОЖАРНИКАРИТЕ Е 48 ГОДИНИ Ако продолжи вака за 5 години ќе нема кој да ги обучи новите кадри
Доведени сме во ситуација ова обраќање да биде апел, односно директна замолница до Владата и другите надлежни институции ургентно да започнат со решавање на овој проблем, пред да биде доцна - се наведува во соопштението од Синдикатот.
Независниот синдикат на пожарникари укажува на недостигот на професионални пожарникари во територијалните противпожарни единици во земјава. Оттаму посочуваат дека не е запазен законскиот минимум и просечната старост на вработените е околу 48 години.
– Состојбата е алармантна имајќи предвид дека пополнетоста на единиците е некаде на 50 проценти од законскиот минимум, додека просечната старост на вработените во повеќе единици изнесува околу 48 што укажува на фактот дека ако ова прашање не се реши набрзо, некои од единиците во наредните 5 години ќе останат без соодветен кадар кој како поискусен би требало да ги едуцира во работата новите колеги – велат од Синдикатот.
Хроничниот недостиг на вработени, според Синдикатот, сериозно влијае врз квалитетот на извршување на акциите на спасување животи и имот на граѓаните и претставува опасност по безбедноста и здравјето на пожарникарите кои се обидуваат да го надоместат недостигот на персонал.
– Доведени сме во ситуација ова обраќање да биде апел, односно директна замолница до Владата и другите надлежни институции ургентно да започнат со решавање на овој проблем, пред да биде доцна – се наведува во соопштението од Синдикатот.