📷 ПРОКИСНУВААТ ТАВАНИТЕ ВО МНТ Министерот Љутков шокиран од состојбата на театарот
Актерите на МНТ добиле прекрасна зграда за која не велам дека немало пропусти во изградбата, но сепак од 2017 година морало да се интервенира и да се одржува, рече министерот за култура Зоран Љутков.
Тавани кои можат да се срушат во секој момент и кофи полни со вода. Ваква е состојбата во Македонскиот народен театар (МНТ).
Министерот за култура и туризам, Зоран Љутков, во рамките на редовните посети на институциите од областа на културата, денеска го посети овој објект, па како што изјави, шокиран е од состојбата во која се наоѓа театарот.
Во изјавата за медиумите Љутков рече дека во МНТ затекнал две состојби – од едната е пресреќен, откако видел како течет работите на претставите што се во тек, додека од другата, како што рече, е ужаснат.
– Шокиран сум од состојбата во која се наоѓа театарот, а која трае веќе 7–8 години. Иако се знаело за состојбата и во текот на годините имало обезбедени средства за поправки и прекравки, тоа сепак не се случило. Театарот е изграден со многу љубов. Актерите на МНТ добиле прекрасна зграда за која не велам дека немало пропусти во изградбата, но сепак од 2017 година морало да се интервенира и да се одржува. Во однос на буџетот, имало години кога МНТ имал по 20 милиони денари за продукција. Во 2017 имало 14 милиони денари, а денес имаме 4 милиони денари – рече министерот Љутков.
Љутков изрази задоволство од менаџерската работа на директорот Никола Кимовски кој во моментов продуцира неколку претстави во МНТ за кои дел од средствата се обезбедени од Министерството за култура и туризам.
