ПРОЕКТИ, АМБУЛАНТА И НОВИ МОЖНОСТИ Мицкоски ветува подобар живот во Шуто Оризари

На предизборниот митинг во Шуто Оризари, претседателот на ВМРО-ДПМНЕ, Христијан Мицкоски, порача дека општината ќе стане пристојно место за живеење, со решавање на инфраструктурни проекти и создавање квалитетен живот за жителите.

– Многу ми е драго што сум тука, во место со многу проблеми, но со големо срце и душа. Долго време оваа општина беше маргинализирана, газено беше достоинството на луѓето, но тоа мора да заврши. Шуто Оризари мора да оди напред, да решава крупни проблеми и да ги направиме животните услови подобри – изјави Мицкоски.

Мицкоски најави дека времето кога општината се третирала како приватна фирма на неколкумина завршува. Тој ги повика граѓаните да гласаат мудро на локалните избори и да го изберат кандидатот на ВМРО-ДПМНЕ, Ерџан Демир.

– Овој пат веќе не треба да се прифаќаат непринципиелни понуди и поткупи. Ветувам работа и решавање на проблемите со кои секојдневно се соочувате. За иднината на вашите деца, за квалитетен живот и проекти што навистина се реализираат – рече Мицкоски.

Меѓу најавените проекти се, изградба на амбуланта во Шуто Оризари за подобар здравствен третман на жителите. Продолжување на соработката со градот Скопје и Владата за инфраструктурни подобрувања.

Кандидатот за градоначалник Ерџан Демир истакна дека неговата цел е реална промена, а не празни ветувања:

– Другите велеа дека ќе направат „мал Париз“ или „Дубаи“ во Шуто Оризари, но ние ветуваме и реализираме. Заедно со градоначалникот Орце Ѓорѓиевски ќе направиме општината средена, чиста и безбедна, со подобри услови за живот – изјави Демир.

Потпретседателот на ВМРО-ДПМНЕ, Владо Мисајловски, порача дека жителите заслужуваат чесна и транспарентна локална власт, која ги решава вистинските проблеми.

– Со поддршка на Владата и новата локална власт, Шуто Оризари ќе добие инвестиции во инфраструктурата и јавните услуги. На изборите излезете и гласајте за иднината на вашето маало, за број 9 и Ерџан Демир – рече Мисајловски.