ПРОДОЛЖУВА ХАЈКАТА ПРОТИВ НАС Клиниката „Жан Митрев“ соопшти дека продолжува да спасува животи и со блокирани сметки

Одбивањето на жалбата за одблокирање на сметките ја потврдува инструираноста на процесот и организираната хајка против Клиника Жан Митрев, обвини клиниката преку соопштение.

„Tоа што Советот на Апелациониот суд Скопје ја одби жалбата за деблокирање на сметките е свесно и намерно спречување на работата на Клиника Жан Митрев и натамошна реализација на намерата клиниката да се доведе во позиција на неодржлива криза и да се спречи работата без нималку одговорност за јавниот интерес што го има клиниката како здравствена организација. Токму заради јавниот интерес за пациентите и сите оние што имаат потреба од врвна медицинска нега, беше побарано деблокирање на сметката за клиниката да може да работи без притисокот во секојдневните обврски кон банките и добавувачите. Одбивањето на барањето за деблокирање на сметката зборува за организирана хајка и систематско инструираниот процес против клиниката и д-р Митрев со неосновано обвинение. Во постапката против врвниот македонски кардиохирург и Клиниката Жан Митрев посветени на спасување животи не постои пресумпција на невиност, туку организиран и систематски инструиран процес“, наведено е во реакцијата.

Се надеваме дека, посочено е во соопштението, во фокусот на сите што се посветени на мониторирање на нашиот правосуден систем ќе дојде на ред и врвниот јавен интерес, а тоа е оневозможување на конструирање на судски процеси со цел да се уништат успешни стручњаци и правни субјекти.

„Сепак и покрај блокираните сметки Клиника Жан Митрев секојдневно работи, прави сложени хируршки зафати и спасува животи на наши граѓани“, се вели во соопштението.

ЖАН МИТРЕВ НЕ ЌЕ МОЖЕ ДА РАСПОЛАГА СО ИМОТОТ Апелација ја одби неговата жалба