ПРИВЕДЕНИ СЕДУММИНА ЗА ОРГАНИЗИРАЊЕ БОРБИ СО КУЧИЊА Акција на полицијата во Куманово
Уапсените се од тетовско, од Гостивар и од кумановското село Черкезе. Против нив ќе следуваат соодветни кривични или прекршочни пријави.
Полициска акција на СВР Куманово резултираше со приведување на седум лица осомничени за организирање борби со кучиња, нелегална и сурова практика која со години повремено се појавува во различни делови од државата.
Според информациите од полицијата, на 23 март околу 23 часот, службеници ги лишиле од слобода С.Р. (34), А.М. (31), А.М. (27), Ј.К. (38), сите од тетовско, како и С.А. (40) од селото Черкезе, кумановско, и Н.М. (62) од Гостивар. Тие биле затекнати на подрачјето на Куманово при организирање борба со кучиња.
Осомничените се приведени во полициска станица, а од МВР информираат дека по целосно документирање на случајот ќе следуваат соодветни кривични или прекршочни пријави.
Борбите со кучиња се забранети со закон и претставуваат форма на злоупотреба и малтретирање на животни. Во изминатите години, полицијата во повеќе наврати разоткриваше вакви случаи, најчесто поврзани со нелегално обложување и организирани групи кои профитираат од вакви настани.
Организациите за заштита на животните подолго време алармираат дека ваквите активности не само што предизвикуваат сериозно страдање кај животните, туку често се поврзани и со други облици на криминал. Тие бараат построги казни и поинтензивни контроли на терен.
Надлежните најавуваат дека ќе продолжат со засилени акции со цел сузбивање на ваквите појави и санкционирање на сите инволвирани.