ПРИОРИТЕТ СЕ ЗАКОНИ ОД ПРАВОСУДСТВОТО, ЕНЕРГЕТИКАТА И ОД ЗДРАВСТВОТО Филипче и Мицкоски договориле работни групи да работат на реформската агенда
Имавме добар и навистина конструктивен состанок со премиерот. Сметам дека и до него јасно е стигната пораката и барањето на граѓаните за некаква форма на заедничка работа во сфери кои што се битни да го подобрат квалитетот на живеење, рече претседателот на СДСМ Венко Филипче, по средбата со премиерот Христијан Мицкоски во Владата.
Преседателот на СДСМ Венко Филипче како добар и конструктивен го оцени состанокот со премиерот и лидерот на ВМРО-ДПМНЕ Христијан Мицкоски. По средбата во Владата тој потенцираше дека ова е позитивен сигнал дека тие ги слушаат барањата на граѓаните. Мицкоски и Филипче се договориле да бидат формирани работни групи за реформската агенда во делот на правосудството, енергетиката и здравството.
– Имавме добар и навистина конструктивен состанок со премиерот. Сметам дека и до него јасно е стигната пораката и барањето на граѓаните за некаква форма на заедничка работа во сфери кои што се битни да го подобрат квалитетот на живеење. Начелно договоривме дека ќе работиме на начинот да формираме заеднички тела или работни групи во делот, пред сè, на спроведување на реформската агенда – рече Филипче.
Според него, првите закони кои треба да стигнат во Собранието се од областите правосудството, енергетиката и здравството.
Претседателот на СДСМ рече дека има волја од двете страни, дека допрва треба да се разработи методологија за работа на заедничките групи, како и дека ова е првичен состанок. Следна средба засега не е договорена.
Во наредниот период ќе бдат номинирани експертите кои ќе бидат дел од работните групи.
– Сега ќе номинирам неколку експерти од областа на правосудството и енергетиката кои ќе се вклучат во изработката на законите коишто се дел од реформската агенда – рече Филипче.
Тој потенцираше дека се работи за меѓупартиска средба, а во работните групи ќе бидат поканети да се вклучат сите партии.
Филипче очекува дека после ова сите политички партии ќе седнат на масата.
– Ова е за доброто на државата. Немаме доволно човечки капацитет, а младите сè повеќе заминуваат од земјата. Затоа, мора да се пушти порака за обединување за доброто на државата – рече тој.
На средбата се зборувало и за евроинтеграциите и уставните измени.
– За жал, тука имаме различни позиции. Ги разбирам позициите на премиерот. Останува за ова да разговараме дополнително – рече претседателот на СДСМ.
Тој вели дека не се работи за етнички состанок и рече дека очекува по оваа средба да се случи и средба со другите лидери.
– Граѓаните со ова треба да бидат свесни дека некој ги слуша нивните барања – рече Филипче и наведе дека средбата е позитивен сигнал и за прв пат се случува вакво нешто во земјата.
Одговарајќи на новинарско прашање во врска со пожарот во модуларната болница, тој рече дека не чувствува одговорност и дека нема проблем случајот да биде повторно отворен.