Прифатени барањата на занаетчиите, следи нивна реализација

Министерот за економија Крешник Бектеши денеска одржа работен состанок со претставници од Комората на занаетчии, на кој беа доставени барања од страна на Комората, а кои во наредниот период би требало да бидат исполнети од страна на Владата.

– Барањата од Комората ќе бидат исполнети со цел да го олесниме работењето на занаетчиите, кои се еден многу важен сектор кој во континуитет е поддржан од страна на министерството за економија. Тоа го покажуваме со начинот на водењето на политиките и спроведување на мерките кои беа предвидени во министерството. Исто така не се скратени мерките од КИП-програмата за поддршка на занаетчиите и веќе повеќето се реализирани или во тек и имаме буџет за нив – изјави Бектеши.

Тој додаде дека се согласиле со комората и дека нивните барања може да се реализираат и во третиот сет економски мерки кој Владата планира за кратко време и да ги објави, но истовремено нивните барања биле да има посебни кредитни линии кои ќе можат да ги користат само занаетчиите.

Oд Занаетчиската комора рекоа дека имале конкретна и коректна средба со министерот Бектеши на која насочиле и кажале во каква состојба е занаетчиството денеска. На министерот му било образложено дека занаетчиството е во тешка состојба, му биле пренесени нивните забелешки, како и нивните барања кои очекуваат да се исполнат.

– Од страна на министерот веднаш беа прифатни нашите барања, при што им било ветено дека истите ќе бидат разгледани и прифатени со цел да им се помогне на занаетчиите да ги задржат своите дуќани отворени, да ги задржат своите работни места и оваа криза да помине со што помалку последици – велат од Занаетчиската комора.