ПРЕТСЕДАТЕЛОТ НА МАКЕДОНСКИОТ ПОЛИЦИСКИ СИНДИКАТ НЕ Е ВЕЌЕ ДОЦЕНТ По проверка на Инспекторатот укинато му е звањето

Државниот просветен инспекторат го укина звањето „доцент“ на д-р Марјан Кицев, актуелен претседател на Македонскиот полициски синдикат, откако утврдил неправилности и незаконитости при неговиот избор.

Преставки до Инспекторатот поднеле физичко лице, како и партијата Левица.

Инспекторатот извршил вонредна инспекција на Универзитетот за изборот во наставно-научно звање на д-р Марјан Кицев во наставно-научно звање доцент, како и по однос на неговиот статус на вработено лице на Универзитетот.

За ова на Фејсбук објави лидерот на Левица Димитар Апасиев.

„По претставка на Левица, Државниот просветен инспекторат утврдил неправилности и незаконитости при изборот на д-р Марјан Кицев, актуелен претседател на Македонски полициски синдикат и близок човек на министерот Оливер Спасовски, во наставно-научното звање „доцент“ на еден приватен универзитет!ДПИ утврдил прекршување на чл. 174, ст. 1 и чл. 182, ст. 1 од важечкиот Закон за високото образование (Сл. весник на РМ бр. 82/2018) и донел управен акт, т.е. Решение за изрекување инспекциска мерка – по што, Наставно-научниот совет на Правниот факултет на МСУ „Державин“ донел Одлука за укинување на наставно-научното звање на пријавениот“, напиша на својот ФБ профил Апасиев.