ПРЕКИНАТ ИНТЕРНЕТ, ЖРТВИ НА УЛИЦИТЕ Иран директно ги обвини САД за насилството и хаосот
Иранските власти тврдат дека странско мешање ја претворило граѓанската непослушност во насилни немири, додека протестите продолжуваат и покрај блокираниот интернет.
САД се виновни за „трансформирањето на мирните протести во насилство, субверзија и широко распространет вандализам“ во Иран, изјави постојаниот претставник на Исламската Република во Обединетите нации пред Советот за безбедност.
Иран го осудува, како што наведува, „континуираното, нелегално и неодговорно однесување на САД, во координација со израелскиот режим, во мешањето во внатрешните работи на Иран преку закани, поттикнување и намерно промовирање нестабилност и насилство“, напиша иранскиот амбасадор во ОН, Амир Саид Иравани, во официјално писмо.
Според него, ваквите потези претставуваат „дестабилизирачки практики“ што ја поткопуваат Повелбата на ОН, ги кршат основните принципи на меѓународното право и ги загрозуваат темелите на меѓународниот мир и безбедност.
Во меѓувреме, на улиците на Техеран, според ограничените информации кои пристигнуваат од земјата поради прекинот на интернет што трае повеќе од 24 часа, протестите продолжиле и синоќа, и покрај заканувачките СМС-пораки испратени до граѓаните со предупредувања да не учествуваат, објави Би-Би-Си.
Според американската организација „Активисти за човекови права“, во антивладините протести досега загинале најмалку 62 лица.
Истата организација, која и во претходни бранови на насилство во Иран се покажала како релевантен извор, наведува дека за време на демонстрациите биле уапсени најмалку 2.300 лица, пренесе БТА.