Преговарачката рамка, историски пораз на Македонија

Во Брисел, на 19 јули 2019 година, се одржа меѓувладина конференција меѓу Македонија и ЕУ, за зачленување.

Тоа беше можно откако два дена порано, на 17 јули, во Софија, Бујар Османи потпиша втор протокол, којшто претставува целосна капитулација на Македонија.

Со преговарачката рамка, којашто e усогласена, ама сѐ уште не сме ја прифатиле, Македонија нема никогаш да влезе во ЕУ.

Со вториот протокол, Македонија прифати серија бугарски ултиматуми, што е срамно понижување. Ќе се менува и уставот, што не е обврска од договорот за (не)пријателство. Тоа следува откако Софија не успеа да го убеди светот дека не постоиме како народ. За таа цел, широко дистрибуираа „објаснувачки меморандум“, следен со други безобразлуци.

На Меѓувладината конференција, објавена е преговарачката рамка, со којашто СЕ ПОВИКУВА НА НАШЕ ИСПОЛНУВАЊЕ како на договорите, така И НА СИТЕ ПРОТОКОЛИ со Бугарија.

За да се прикрие овој наш тежок пораз од Бугарија, измислен е „француски предлог“. Како претседавач со ЕУ, Франција, секако вршела жесток притисок, ама капитулацијата е – наша.

*     *     *

На конференцијата, ЕУ претстави четири документи:

I ВОВЕДНА ИЗЈАВА ЗА ОТВОРАЊЕ ПРИСТАПНИ ПРЕГОВОРИ

Во неа се вели дека одржаната меѓувладина конференција е – „прва фаза на отворање на пристапни преговори на Македонија со ЕУ“. Значи, преговорите не се отворени.

1. Клучен за нас е делот во кој се вели – „Во однос на преводите на правото на ЕУ на македонски, ЕУ ги зема предвид соодветните еднострани декларации на Бугарија и Македонија за македонскиот јазик“!

2. Со официјалното повикување на бугарската изјава, дека македонски јазик – нема, ЕУ го отвори патот за негово негирање. Нашата изјава е барана како баланс на бугарската, и таа е – катастрофална! Сѐ со цел да се одоброволи Софија!

3. Бугарија тврди дека нашиот јазик е дијалект на нивниот, а главна поента во нашиот одговор е дека македонскиот јазик е кодифициран во 1945 година! Таквата формулација, сигурно диктирана од Софија, целосно се поклопува со бугарската небулоза дека токму тогаш нѐ измислил – Тито! Заедно со јазикот! Изјавата е наша погубна капитулација за јазикот!

4. Ова е и директна потврда дека ПРАШАЊЕТО НА МАКЕДОНСКИОТ ЈАЗИК ВО ЕУ – НЕ Е РЕШЕНО, како што ни тврдат. ЕУ отворено се дистанцира од македонскиот јазик, иако за тоа нема никаква основа. Ова е официјална најава дека, на крајот, МАКЕДОНСКИОТ ЈАЗИК ЌЕ БИДЕ ОСПОРЕН. На кој начин и како, ќе видиме. Бугарија, во никој случај, нема да дозволи во ЕУ да се користи изворен македонски јазик.

5. Се – „потсетува на важноста од … спроведување на билатералните договори со Грција и Бугарија“ и „постигнување на видливи резултати“! Значи, од нив ќе зависи напредокот!

II ПРЕГОВАРАЧКА РАМКА

Точка 3 – „темпото на проширување мора да го земе предвид капацитетот на Унијата да прими нови членки…“. Јасно ни порачале да не бидеме премногу оптимисти.

1. Точка 5 – „…посветеноста на Македонија за добрососедски односи и поблиска регионална соработка, вклучително ПРЕКУ ПОСТИГНУВАЊЕ ВИДЛИВИ РЕЗУЛТАТИ И СПРОВЕДУВАЊЕ НА БИЛАТЕРАЛНИТЕ ДОГОВОРИ ВО ДОБРА ВОЛЈА, ВКЛУЧИТЕЛНО И ДОГОВОРОТ СО ГРЦИЈА И ДОГОВОРОТ ЗА ДОБРОСОСЕДСКИ ОДНОСИ СО БУГАРИЈА ОД 2017, КАКО И ГОДИШНИТЕ ПРЕГЛЕДИ И МЕРКИ ЗА НЕГОВО ЕФЕКТИВНО СПРОВЕДУВАЊЕ според член 12…“.

2. Незамисливо е „ГОДИШНИ ПРЕГЛЕДИ“, поточно протоколи, или записници, да бидат дел од преговарачката рамка! Тоа никако не смеело да се прифати. Така, во прв план се исфрла историската комисија, која ќе одлучува дали и како ќе напредуваме кон Брисел. Фали уште да се повикуваат на SMS телефонски пораки!? За најсигурно да не дотолчат!

3. Објективно, нашиот дел од Комисијата, нема да може да капитулира на сите бугарски невидени будалштини (Делчев, Илинден…). Тоа ќе значи целосна блокада на преговорите. Ако започнат. Затоа, бесмислено е сега да се менува Уставот.

4. Точка 7 – „Суштината на преговорите ќе се води на Маѓувладина конференција со учество на сите членки на ЕУ и Македонија. Таа ќе се одржува најмалку еднаш годишно“.

5. „Комисијата (на ЕУ) систематски ќе ги консултира и земјите членки во текот на процесот на пристапување. Земјите членки може да придонесат преку СЛЕДЕЊЕ НА ТЕРЕН ПРЕКУ НИВНИ ЕКСПЕРТИ…“.

6. И, што мислите? На овие конференции, Бугарија ќе аплаудира на нашиот напредок? Или, дека за секое поглавје нема да испраќа свои „експерти“ во Македонија? Се разбира, со „добра намера“. Да „помогнат“! Ќе бараат влакно во јајце за да не понижат и навредат. И, цело време – ќе нѐ блокираат!

7. Точка 14 – „Комисијата може по сопствена иницијатива или соодветно образложено барање на земја членка, да предложи повлекување на нејзината препорака за отворање и/или затворање на други преговарачки кластери и поглавја“.

8. До сега, тоа право го имаа само третина од членките заедно, а не секоја одвоено. Софија, безмилосно ќе не кастри.

9. Точка 35 – „Македонија… ќе усвои Акциски план посветен на заштита на правата на припадниците на малцинствата или заедниците, вклучително, меѓу другото, на полето на не дискриминација, борба против говорот на омраза, образование, воспоставување ефективни мерки, механизми за известување и идентификување на соодветни одговорни институции. Спроведувањето на овој патоказ и Акциски план постојано ќе се следи и редовно ќе се разгледува на Меѓувладините конференции во текот на целиот процес“.

10. Оваа точка е секако диктирана од Софија. Тие не признаваат малцинства а нам ќе ни држат лекции!? А, најдобри сме во регионот и пошироко. Ова е тешка навреда за земјата и нова капитулација, којашто не смеело да се случи!

11. Точка 47 – „Комисијата внимателно ќе го следи напредокот на Македонија во сите области … вклучително и со стручни посети на лице место од страна на членови на Комисијата И ОД ЗЕМЈИТЕ ЧЛЕНКИ…“.

12. И, по оваа точка, Бугарија ќе не „чести“ со безброј „стручни“ посети. Тоа ќе биде неподнослива инвазија. Тогаш, и формално ќе станеме нивни протекторат. Ќе не растураат.

13. Точка 47 – „Комисијата ќе посвети посебно внимание на заложбите на Македонија за добрососедски односи и регионална соработка, како што е наведено во точка 5 и ќе ја информира Меѓувладината конференција за нивното спроведување“!?

14. Ова е потврда и доказ дека точка 5 ќе биде клучна во преговорите, А МНР, Османи, тоа го негираше. ВИДЛИВИТЕ РЕЗУЛТАТИ на историската комисија, ќе ни ја одредуваат судбината. Таа ќе биде филтерот за напредување кон ЕУ.

III ПРЕДЛОГ – ЗАКЛУЧОЦИ НА СОВЕТОТ

Обврската за „видливи резултати“ во спроведувањето на договорите со Грција и Бугарија, е главен заклучок во точка 2.

1. Точка 3, оди чекор потаму – „Советот го поздравува договорот за протоколот од вториот состанок на Заедничката меѓувладина комисија формирана според член 12 од договорот (со Бугарија)“!? “Овој важен чекор ќе придонесе кон добрососедските односи и регионалната соработка…“!

2. И Точка 4 е посветена на вториот протокол со Бугарија, којшто – „ќе овозможи зајакнување на еднаквите права на припадниците на малцинствата … во Македонија и како таков ќе придонесе кон усогласувањето со Копенхашките политички критериуми … Советот ја поздравува намерата на Македонија … приоритетно да ги постигне релевантните уставни измени … да се вклучат граѓани од други народи, како што се Бугарите“!?

3. Ова се бриселски мизерии со коишто се сложиле нашите неписмени политичари. Главен станува вториот протокол, којшто е НАША ТОТАЛНА КАПИТУЛАЦИЈА СО БУГАРИЈА! Во овој контекст, пак, спомнувањето, на Копенхашките критериуми е чиста измама и тежок безобразлук на Брисел.

4. Точка 6 – „Со цел да се заврши оваа фаза на ОТВОРАЊЕ НА ПРЕГОВОРИТЕ ЗА ПРИСТАПУВАЊЕ, Советот, исто така, одлучува да свика друга меѓувладина конференција со цел да ја претстави Преговарачката рамка … веднаш штом Македонија ЌЕ ЈА СПРОВЕДЕ СВОЈАТА ЗАЛОЖБА ЗА ЗАВРШУВАЊЕ НА ГОРЕНАВЕДЕНИТЕ УСТАВНИ ИЗМЕНИ…“.

5. Одлично – УСТАВНИТЕ ИЗМЕНИ СЕ НАША ЗАЛОЖБА!?

IV ПОЛИТИЧКИ СОСТАНОК НА МЕЃУВЛАДИНАТА КОНФЕРЕНЦИЈА ЗА ПРИСТАПУВАЊЕ НА МАКЕДОНИЈА ВО ЕВРОПСКАТА УНИЈА – ЗАЕДНИЧКИ СТАВ НА ЕУ

(Овој документ треба да биде усвоен на втората меѓувладина конференција, ако го промениме Уставот)

Точка 11 – Оваа меѓувладина конференција ќе се одржи – “… веднаш штом Македонија ќе ја спроведе СВОЈАТА ЗАЛОЖБА ЗА ЗАВРШУВАЊЕ НА УСТАВНИТЕ ИЗМЕНИ…“

1. Точка 14 – „Македонија треба да продолжи конструктивно да се ангажира во инклузивната регионална соработка и да ги зајакне односите со соседите“. „Денес, потсетуваме на важноста од постигнување ВИДЛИВИ РЕЗУЛТАТИ и спроведување на билатералните договори во добра волја, вклучително договорите со Грција и Бугарија“. „Во таа насока, го поздравуваме договорот за вториот протокол со Бугарија…“.

2. Врти, сучи, сѐ се сведува на вториот протокол. Со него, Б. Османи потпишал – а) за членство во ЕУ да преговараме со Бугарија и главна тема да биде нашата историја, и б) да бидеме образовен и културен протекторат на Софија. За да се уверите во тоа, прочитајте ја претходната колумна – “’Бисери’ во македонските капитулации со Бугарија“ (2), детално посветена на вториот катастрофален протокол.

3. Точка 17 е прецизна – “Останува на земјите членки да одлучат дали се соодветни условите за завршување на преговорите … и подготвеноста на Македонија за членство“.

4. Некој навистина ли замислува дека, ако не капитулираме на сите бугарски национал-шовинистички барања, Софија ќе се сложи да станеме членка на ЕУ? Особено со македонски јазик? Да не се залажуваме. Никој ли не гледа дека Софија се обидува секаде да ги избрише Македонците? И овде, и во САД, и во Албанија… А вие, ставајте ги Бугарите во Уставот!

5. Се концентриравме на Бугарија бидејќи сме изложени на нејзината стравотна агресија. Преговорите со душа ги чека и Грција. И тие имаат незамисливи барања, и ќе уценуваат.

Место заклучок: Излез од ќор-сокакот, во којшто сме дотерани и со наша голема заслуга, е итно откажување на договорот за (не)пријателство и протоколите со Бугарија. Само така ќе се фрли на буниште и неприфатливата и понижувачка Преговарачка рамка на ЕУ којашто целосно се базира врз нив. Со неа – за Македонија НЕМА ЧЛЕНСТВО во Унијата.