Пратениците од ВМРО-ДПМНЕ стокмија предлог закон за проблемите на тутунарите

Пратеничката група на ВМРО-ДПМНЕ денеска ќе поднесе предлог закон за изменување и дополнување на Законот за тутун, производи од тутун и сродни производи, по скратена постапка.

 Пратеничката Ане Лашкоска, вели дека целта на Предлог законот е да се надминат проблемите и да се обезбеди правна сигурност при откуп на тутунот и покрај поднесен приговор и да се допрецизира третманот на неферментираниот тутун.

– За увезениот необработен тутун, увозникот ги избегнал сите споменати обврски во Глава II, III I IV од Законот за тутун, производи од тутун и сродни производи и не гарантира за потеклото, безбедноста и контролата на производот, што е спротивно на Европската Регулатива 40/2014  како и  Рамковната конвенција за контрола на тутунот на СЗО која ја имаме Ратификувано во 2006 година. Должни сме да ги почитуваме одредбите на истата, потсетувајќи на член 15 од Рамковната конвенција за контрола на тутунот од СЗО, потписниците се обврзани за елиминирање на сите форми на недозволена трговија со тутун и тутунски производи, вклучувајќи криумчарење и нелегалното производство, што е суштинска компонента на контролата на тутунот – вели Лашкоска.

Таа додаде дека обврска на праениците е да се почитува важноста на меѓународните акти и истите да се почитуваат како што се Конвенцијата на Обединетите нации против транснационалниот организиран криминал, Конвенцијата на Обединетите нации за борба против корупцијата и Конвенцијата на Обединетите нации за борба против недозволената трговија со наркотични дроги и психотропни супстанции.

– Сметаме дека со предложеното изменување и дополнување на Законот ќе се создадат услови на целосно и подобро спроведување на Законот и истовремено ги повикуваме пратениците од парламентарното мнозинство да дадат поддршка на измените и дополнувања кои што ги бараат и истовремено ќе ги решат проблемите со кои се соочуваат тутунопроизводителите – порача Лашкоска.