ПОЗНАТ НАСЛЕДНИКОТ НА РУСКОСКА Ислам Абази е нов шеф на Обвинителството за организиран криминал и корупција

Јавните обвинители одлучија за нов шеф на Основното обвинителството за гонење на oрганизиран криминал и корупција да биде шефот на гостиварското обвинителство Ислам Абази.

Тој доби 66 гласови од вкупно 160 обвинители кои можеа да гласаат. На второ место, со 64 гласови или два гласа помалку, заврши скопскиот обвинител Ермон Незири. Пребројувањето е завршено, а се очекува и официјално да се презентираат резултатите.

Покрај Абази, кој беше кандидат број еден за оваа функција, на гласачкото ливче се најдоа и заменикот на шефот на Скопското обвинителство, Ермон Незири, како и вишата обвинителка Деса Пауновска и суспендираната шефица на Обвинителството за гонење организиран криминал и корупција, Вилма Русковска.

На избирачкиот список за подрачјето на Вишото јавно обвинителство Скопје има 91 обвинител, од 160 обвинители, колку што вкупно имаат право на глас. Тоа значеше дека ова обвинителско апелациско подрачје по број на обвинители е пресудно за изборот на обвинител за гонење организиран криминал и корупција.

Инаку изборниот процес мина без забелешки и приговори. Обвинителите гласаа кој од четворицата нивни колеги ќе седне во оваа моќна и жешка фотеља. Меѓу првите утринава беше обвинителот Трајче Пеливанов, кој ја заменува Русковска откако беше суспендирана. Тој гласаше во вишото скопско обвинителство, го пополни ливчето со својот фаворит зад параванот и го стави во гласачката кутија, една од петте во цела држава. Гласањето на обвинителите не им е ново, тие до сега многу пати бираа членови на Советот на јавни обвинители, но избираат ракводител на обвинителство.