РЕЧИСИ 1.000 КОМПАНИИ СЕ ВКЛУЧЕНИ ВО ДУАЛНОТО ОБРАЗОВАНИЕ Годинава бројот на стручни паралелки порасна на 875

Зголемен е бројот на ученици што се запишуваат во стручните училишта – за шест години евидентиран е раст од 12,2%. Но, бенефитот од дуалното образование сè повеќе го препознава и бизнис-заедницата – речиси 1.000 компании веќе се вклучени во овој процес.

Според Стопанската комора, во учебната 2025/2026 година Македонија има 65 стручни училишта и 875 дуални паралелки.

Од првата паралелка за ваков вид образование до сега се сертифицирани 1.500 ментори во компании.

– За шест години евидентиран е раст од 12,2% на уписот на ученици во стручно образование. Запишани ученици во стручно образование во учебната 2019/2020 година е 64%, а во учебната 2025/2026 година 71,8%. Во учебната 2019/2020 година во дуалното образование биле вклучени 11 компании, во 2021/2022 година 211 компании, во 2022/2023 година 500 компании, во 2023/2024 година 560 компании, во 2024/2025 година 600 компании, а во 2025/2026 година речиси 1.000 компании. Бројот на стручни училишта во учебната 2019/2020 година бил четири, со по една дуална паралелка, а во 2025/2026 година е 65 стручни училишта и 875 дуални паралелки – вели Наташа Јаневска, проектен менаџер за образование во Стопанската комора.

Таа истакна и дека се обезбедени и  7,6 милиони евра за опремување 12 стручни училишта и 5 факултети во конзорциум со 86 компании/организации преку Германската развојна банка.