ПОТЕШКО ПОВРЕДЕНИОТ ПАТНИК ЌЕ БИДЕ ОПЕРИРАН ВО АНКОНА Другите 11 патници што беа повредени во автобуската несреќа во Италија, се враќаат во Македонија
Во автобуската несреќа што се случи синоќа на автопатот меѓу градовите Асколи Пичено и Анкона кога автобус со македонски туристи се судрил со два камиони, возачот на автобусот загина на лице место, а 12 патиници беа повредени.
Македонскиот државјанин што беше потешко повреден во вчерашната автобуска несреќа во Италија, денеска ќе биде опериран во болницата во Анкона. Другите 11 патници исто така македеонски државјани, кои се здобија со полесни повреди, по укажаната лекарска помош во болницата во Сан Бенедето дел Тронто, се во добра здравствена состојба и се враќаат дома, информираа од Министерството за надворешни работи во врска со вчерашната сообраќајна несреќа во која автобус со македонски туристи се судрил со два камиони на автопатот меѓу градовите Асколи Пичено и Анкона.
„Министерството за надворешни работи преку Амбасадата во Рим доби информации дека по соодветна лекарска помош за добиените лесни повреди, во болница во градот Сан Бенедето дел Тронто биле пренесени 11 патници, државјани на Северна Македонија. Тие во текот на вчерашниот ден беа пуштени дома во добра здравствена состојба. Додека 12-тиот патник, наш државјанин се наоѓа во болница во Анкона, каде што во текот на денешниот ден ќе има хируршка интервенција за добиените повреди во нога и рака“ – соопштија од МНР.
Министерството преку Амбасадата во Рим останува во континуирана комуникација со надлежните италијански институции, кои работат на целосно расчистување на случајот.
Во вчерашната автобуска несреќа во Италија, на лице место почина 59-годишниот возач на автобусот кој е во сопственост на туристичка агенција од Македонија, а повредени беа 12 патници, сите од Македонија.