Попишувачите отпаднаа и од вакцинацијата и од пописот

Попишувачите нема да бидат во приоритетните групи за имунизација откако вчера во спортскиот центар „Борис Трајковски“ почна масовната вакцинација на граѓаните, со оглед на одложувањето на најмасовната статистичка операција за септември. Не само што тие како категорија отпаднаа за вакцинирање, туку отпаднаа и како попишувачи, бидејќи директорот на Државниот завод за статистика Апостол Симовски за Плусинфо вели дека ќе има нов конкурс за попишувачи, зашто пописот ќе се одржи дури по пет месеци. Сепак, Симовски вели дека ќе бара од Министерството за здравство како приоритетни сега да бидат вакцинирани околу 6.000 теренци и вработени во Статистика кои секојдневно се изложени на зараза од ковид-19.

Приоритетни за вакцинација се вработените во АРМ, МВР, судовите, обвинителството, патарините, царина, возачите во јавниот транспорт, новинарите. Во оваа група пред одложувањето на пописот беа и попишувачите.

Се очекува новиот конкурс за попишувачи Статистика да го објави во втората половина на јули и новите попишувачи да бидат имунизирани во август.

– По одложувањето на пописот за септември, целиот процес ќе се повтори. Пред одложувањето, попишувачите беа во приоритетните за вакцинација, но 5 месеци е долг период и можно е во меѓувреме дел од нив да се вработат, а услов е попишувачите да се невработени. Ќе го повториме конкурсот за попишувачи, секако тие кои веќе беа избрани ќе имаат предност доколку повторно се јават на огласот. Се надевам дека до септември ќе се смени и ситуацијата со пандемијата, бидејќи сега имавме многу попишувачи кои се откажаа поради страв од зараза. Добро е и што почна масовната имунизација – вели Симовски.

Тој се надева дека до септември новите попишувачи барем ќе примат една доза од вакцината против ковид-19, а можеби и двете дози, во зависност со која од вакцините ќе бидат имунизирани.

Сепак, тој додава дека во конкурсот не може да наведат дека услов за избор на попишувачи е тие да бидат или да сакаат да се вакцинираарт затоа што со тоа ќе направат дискриминација, бидејќи имунизацијата не е задолжителна туку доброволна и е оставена на свеста и волјата на граѓаните.

– Сепак, да не се залажуваме, вакцинацијата е процес, има прва доза, па во зависност од која вакцина ќе се имунизирате, за втората доза чекате од три недели до три месеци. Добро би било барем попишувачите кои ќе сакаат да се вакцинираат, да го почнат процесот на имунизација, а до септември за кога е презакажан пописот се надевам дека и голем дел од населението ќе биде имунизирано или пак, многумина ќе го имаат прележано вирусот и ќе имаат антитела и создаден имунитет. Во секој случај се надеваме дека ситуацијата во септември ќе биде подобра. Но, ние сега од Министерството за здравство ќе бараме дел од вклучените во процесот на попис да бидеме приоритетна група за имунизација и да влеземе во таа шема– вели Симовски.

Директорот објаснува дека во приоритетните за кои Статистика ќе бара сега да бидат вакцинирани влегуваат околу 6.000 луѓе, меѓу кои и такви кои секојдневно се на терен, контролори, реонски и државни инструктори, членови на комисии на пописни реони.

Тој смета дека до септември повеќето од попишувачите ќе сакаат да се вакцинираат, оти пред одложувањето на пописот се соочиле со ситуација во која голем број попишувачи одбивале да се вакцинираат. Според Симовски, тоа можеби се должело и на фактот дека до скоро немало избор на вакцини, освен таа на „АстраЗенека“, кон која многу од попишувачите имале резрева. Доколку се исполнат најавите од власта, дека сега, покрај „АстраЗенека“ и „Спутник V“, во земјава ќе пристигнат и кинеските вакцини, можеби кај попишувачите ќе порасне и интересот за имунизација.

За илустрација, пред одложувањето на пописот и во екот на третиот бран на пандемијата, во Куманово од 300 попишувачи само 100 се пријавиле дека сакаат да се вакцинираат со вакцината на „АстраЗенека“.