ПОЛИЦИЈАТА СЕ ПОФАЛИ ДЕКА КРЕНАЛА ДУРИ 26 ВОЗИЛА НА „НИКОЛА ВАПЦАРОВ“ Ни улица од 150 метри не може да биде вистинска пешачка зона во Скопје
Жителите на пешачката улица Никола Вапцаров во центарот на Скопје со години се жалат дека не можат ниту да влезат ниту да излезат од паркингот од непрописно паркираните возила на оваа пешачка улица.
За четири месеци „Пајакот“ кренал дури 26 возила кои биле непрописно паркирани на пешачката улица Никола Вапцаров, во центарот на Скопје.
Жителите на пешачката улица Никола Вапцаров во центарот на Скопје со години се жалат дека не можат ниту да влезат ниту да излезат од паркингот од непрописно паркираните возила на оваа пешачка улица. Овде со години бесплатно се паркираат возила, а всушност паркирањето е забрането.
„Во периодот од 01.04 до 31.07.2024 година на улицата Никола Вапцаров во Скопје од страна на Одделението за безбедност на патниот сообраќај при СВР Скопје е постапено во врска со непрописно паркирани возила при што во горенаведениот период извршени се сообраќајни контроли и преземени се 26 мерки против сторители на прекршокот ‘непрописно запирање и паркирање’ и 26 возила се подигнати со специјално возило ‘Пајак’“, се наведува во одговорот што го добивме од МВР.
Оттаму додаваат дека Одделението за безбедност на патниот сообраќај во континуитет ќе продолжи со редовни контроли и ќе се преземаат мерки согласно проблематиката на таа сообраќајница.
Улицата Никола Вапцаров излегува на плоштадот Македонија, а во средина има влез за паркинг на станарите. Жителите се жалат дека не можат да се разминат од паркирани возила или комбиња кои вршат дотур на стока. Станарите се сомневаат дека возилата се на лица кои имаат врски со полицијата и дека поради тоа никој не реагира на нивните бројни поплаки.
Од Општина Центар пред неколку години соопштија дека се запознаени со овој проблем и дека размислуваат да постават рампа со што ќе биде дозволен влез само за жителите на околните згради. Но, од таа најава и по толку години – нема ништо.
Полицијата по речиси две недели ни одговори дека вршела редовни контроли и дека казнила 26 возачи за 4 месеци. Бројката е неверојатна, зашто очигледно е дека само во еден ден на оваа улица бесплатно запираат триесетина возила. Кој кого лаже, или полицијата кренала раце од упорните граѓани кои сакаат возилото да им биде пред нос додека пијат кафе околу плоштадот? После се ова се поставува прашањето како воопшто во Скопје може да постои пешачка зона?
ОД КОЛИТЕ НЕ СЕ ГЛЕДААТ КЛУПИТЕ
Во 2011 година заврши реконструкцијата на улицата Никола Вапцаров во должина од 150 метри на потегот од плоштадот „Македонија“ до булеварот Димитрие Чуповски. Поставени беа нови пошироки тротоари со плочки од вештачки гранит, целокупниот простор се облагороди со дрворед од 30 јапонски цреши, нови канделабри со 30-тина корпи со букети цвеќе, 14 мермерни жардиниери со хортикултурни аранжмани и нови клупи за граѓаните. Изградено е и ново такси – стојалиште и постојка за патници за јавниот градски сообраќај на самиот спој со булеварот Димитрие Чуповски, како и специјална лента за дотур на стока за околните комерцијални субјекти.
„Во согласност со Деталниот урбанистички план, улицата Никола Вапцаров предвидено е да биде користена од автомобили, но со посебен режим на сообраќај само за граѓаните што живеат на таа улица. Поради ова се поставени две хидраулични столбчиња на почетокот од улицата, со кои ќе се оневозможи да се паркираат автомобили. За овој зафат се потрошени 11,5 милиони денари од локалниот буџет“, соопштија тогаш локалните власти.