🎥 ПОГРЕБОТ НА НАВАЛНИ ПОД СИЛНИ БЕЗБЕДНОСНИ МЕРКИ Путин не сака да му се повтори „случајот Немцов“

Рускиот опозициски политичар Алексеј Навални денеска ќе биде погребан во Москва, две недели откако ненадејно почина на 47-годишна возраст во казнена колонија на Арктикот. За погребот на Навални во Москва се спроведуваа силни безбедносни мерки.

На неколку часа до планираниот погреб на Алексеј Навални, членовите на неговиот тим тврдат дека сè уште се соочуваат со потешкотии во организацијата на церемонијата. Неговата портпаролка Кира Јармиш потврди дека не успеале да најдат погребна кола за да го однесат телото во црквата.

– Непознати лица се јавуваат во мртовечниците и им се закануваат ако прифатат да го преземат телото на Алексеј – се пожали Јармиш.

Најголемиот критичар на Путин ќе биде погребан во Маржино, на периферијата на Москва. Во средата, тимот објави дека комеморацијата ќе започне во 14:00 часот по московско време (12:00 часот по средноевропско) во црквата.

Погребот треба да се изврши на блиските гробишта Борисовскоје во 16:00 часот по московско време и ќе се пренесува во живо на Јутјуб каналот на Навални.

Навални почина на 16 февруари во руски затвор во Арктичкиот круг. Тој помина три години во затвор. Неговиот тим, кој ги покани луѓето да присуствуваат на комеморацијата и погребот, сподели карта на маршрутата помеѓу двете локации. Тие споделија и список со места во странство – од Сеул до Рим, Монтреал и Стокхолм – каде што луѓето можат да се приклучат на комеморацијата за Навални.
Не е јасно колку луѓе ќе присуствуваат на погребот во Москва. Говорејќи за Би-би-си, поранешниот шеф на кабинетот на Навални, Леонид Волков, призна дека е загрижен за тоа што може да се случи за време на погребалната церемонија во Москва.

– Се плашам дека може да се очекуваат изненадувања. Искрено, додека зборувам сега, не знам дали навистина ќе дозволат луѓето да се збогуваат со Алексеј – рече Волков.

Тој додаде дека тимот на Навални е исто така загрижен дека може да има проблеми со црквата во која се одржува богослужбата. Во март 2015 година, илјадници луѓе излегоа на улиците да му оддадат почит на убиениот опозициски политичар Борис Немцов, но малку е веројатно дека сега ќе биде дозволено слично јавно излевање на тага за противникот на претседателот Владимир Путин.

Во последниве години, руските власти ја потиснаа секоја акција што може да се протолкува како критика на владата. Обидите да се одбележи смртта на Навални наиде на насилен одговор, при што импровизираните споменици беа отстранети и стотици луѓе беа уапсени.

Фотографиите кои од вчера кружат на социјалните мрежи покажуваат силно полициско присуство и бариери кои ќе бидат поставени во близина на црквата каде што ќе се одржи панихидата и на гробиштата каде што треба да биде погребан Навални.

Телеграмскиот канал RusNews исто така објави дека се поставени надзорни камери „на уличните светла“ околу гробиштата.

Alexei Navalny’s public memorial ceremony is set to take place at 12 p.m. Moscow time at a church in southeastern Moscow.

Footage published by @mediazzzona this morning showed a convoy of police trucks heading toward the church.pic.twitter.com/rkRuBYRS6U

— The Moscow Times (@MoscowTimes) March 1, 2024

Група адвокати и бранители на човекови права споделија совети на социјалните мрежи за оние кои планираат да присуствуваат на погреб.

Тие предупредија на „провладините активисти“ кои се однесуваат како провокатори и ги повикаа луѓето да останат будни.

„Не може да се исклучат притвори по церемонијата. Останете под радарот на безбедносните сили – не користете јавен превоз“ –  стои во една од пораките.

Дополнително, на луѓето им се советува да не носат предмети со фотографијата на Навални или симболот на неговата Фондација за борба против корупцијата, која руските власти ја нарекоа екстремистичка организација. Не е познато кои членови од семејството на Навални ќе можат да присуствуваат на погребот освен неговата мајка Људмила, која неодамна јавно ги обвини властите дека го криеле телото на нејзиниот син.
Децата на Навални, 23-годишната Дарија и 15-годишниот Захар, живеат во странство. Неговата вдовица Јулија моментално не е во Русија. Доколку се врати, би можела да биде уапсена поради нејзините неодамнешни јавни изјави во кои го обвини рускиот претседател Владимир Путин за смртта на нејзиниот сопруг.

Властите, наводно, со денови се обидувале да ги спречат обидите на тимот на Навални да организира јавна церемонија за збогување со лидерот на опозицијата. Во вторникот Јармиш изјави дека се обидуваат да најдат место за одржување на церемонијата.

Таа истакна дека некои погребални домови тврдат дека се полни, додека други рекле дека им е „забрането“ да работат со тимот на Навални. Вдовицата на Навални, Јулија, во говорот во средата рече дека не знае дали погребот ќе биде мирен или дали полицијата ќе ги уапси оние што дошле да се поздрават.