Почина пожарникар во Загреб при интервенција по невремето, во Тузла прогласена природна непогода ФОТО

По силното невреме кое синоќа го зафати Загреб противпожарните и дежурните служби цела ноќ биле на терен. Тие извршиле над стотина интервенции, а при една од нив почина и пожарникар, кому му се слошило, јавува хрватски Индекс.

Поплавени се и делови од трговски центри, а голем број возила останаа заглавени под подвозниците. Од невреме во послаб обем беа погодени и северна Далмација и Истра.

По

Невреме вчера имаше и во Тузла, Босна и Херцеговина, по кое Градскиот кризен штаб за Цивилната заштита прогласи состојба на природна непогода.

Првите информации покажуваат дека штетата во овој град е исклучително голема, а сите расположиви екипи се на терен, пренесува порталот Kликс.

Во Тузла синоќа паднаа 70 литри дожд на метар квадратен за 40 минути, што доведе до големи поплави и предизвика значителна материјална штета во целиот град.

Екипи од противпожарната служба испумпуваат вода надвор од зградите во градот, а одводите се чистат.

Синоќа, после еден час на подрачјето на Тузла, се случи целосен колапс, поради силниот дожд проследен со засилен ветер и грмежи. За неколку минути беа поплавени градските улици, автомобилите тешко се движеа, а ветрот кршеше дрвја.

Исто така, поплавени се десетици станбени и деловни згради, а некои населени места се без струја и вода.