Почина легендарниот гитарист Еди ван Хален
Почина Еди ван Хален, еден од основачите на легендарната хард рок-група „Ван Хален“, на 65-годишна возраст.
Легендарниот холандско-американски гитарист почина во вторникот по долгата борба со ракот на грлото, а веста за неговата смрт ја објави неговиот син Волфганг.
„Не можам да поверувам дека го пишувам ова, но татко ми, Едвард Лодевик ван Хален, утрово ја изгуби долгата и мачна битка со ракот. Тој беше најдобриот татко што можев да го замислам. Секој момент што го поминавме заедно на сцената или надвор, беше подарок. Срцето ми е скршено и мислам дека никогаш нема да закрепнам од оваа загуба. Те сакам, тато“, напиша Волфганг.
Еди, според ТМЗ, се борел со рак повеќе од една деценија. Според американскиот портал, тој лани бил неколкупати во болница, а неодамна бил на хемотерапија.
И покрај тоа, Еди продолжил да присуствува на концертите и да вежба со неговиот син Волфганг, кој стана басист на „Ван Хален“ во 2006 година.
Тој покажал музички талент од рана возраст, ѝ се посветил на гитарата од 12-та година од животот. Важи за еден од најдобрите рок-гитаристи на сите времиња, а славата ја стекна со групата „Ван Хален“, која ја основаше со неговиот брат Алекс во 1972 година.
— Wolf Van Halen (@WolfVanHalen) October 6, 2020
ФОТО: Твитер