Почина Јаким Ивановски – прв генерален директор на Стопанска банка а.д. Битола
Во периодот додека раководел со Банката, таа од списанието „Finance Central Europe“ три години по ред (2003, 2004 и 2005) е прогласувана за најдобра банка во Македонија, а тој три пати едноподруго е носител на престижната титула „Банкар на годината“.
Во 88-та година од животот во Скопје, почина м-р Јаким Ивановски, македонски стопанственик и општественик.
Роден е во селото Лазарополе, во 1933 година. Дипломирал и магистрирал на Економскиот факултет во Скопје. Во тек на својот работен век извршувал бројни функции: директор на Индустријата за кожи „Борис Кидрич“ – Битола, претседател на Извршниот одбор на општина Битола (1974-1979), функционер во органите на Стопанската комора на СФРЈ и СРМ.
М-р Јаким Ивановски бил пратеник во Собранието на Република Македонија од редовите на Либералната партија во првиот и вториот парламентарен состав (1990-1998). Во 1978 година бил именуван за индивидуален работоводен орган на Стопанска Банка – Основна Банка Битола и оваа функција ја извршувал во два мандата до 1995 година. По издвојувањето од Стопанска банка – здружена банка Скопје, е именуван за генерален директор на Стопанска банка а.д. Битола, функција која ја обавувал до пензионирањето во 2008 година со навршени 51 година работен стаж.
Во овој период банката што ја раководи, од списанието „Finance Central Europe“ три години по ред (2003, 2004 и 2005) е прогласувана за најдобра банка во Македонија, а директорот три пати едноподруго е носител на престижната титула „Банкар на годината“. Беше член на управниот одбор на Здружението на банкарство при Стопанската комора на Македонија, како и бројни здруженија од оваа област, а неговата лична и професионална експертиза беше исклучително ценета од банкарската, финансовата и стопанската фела на Македонија.