ПО „ВАЛКАНАТА БОМБА“ ЌЕ СЕ ТРАГА НА ДВЕ ЛОКАЦИИ Украина побара од МААЕ да ги испита руските обвинувања
Додека рускиот министер за одбрана Сергеј Шојгу ги предупреди Турција, Франција, Велика Британија и САД дека Украинците спремаат ваква бомба, за Киев неговите зборови се изговор со кој самата Русија би ја употребила бомбата. „Валканата“ бомба е конвенционална бомба која содржи мал процент радиоактивни честички.
Експерти на Меѓународната агенција за атомска енергија (МААЕ) денеска започнаа со проверка на две локации каде руските власти тврдат дека Украина произведува валкана бомба. Генералниот директор на МААЕ, Рафаел Гроси изјави дека инспекциите започнале на две локации во Украина и ќе бидат завршени наскоро.
Украина ги побара тие инспекции по руските обвинувања.
Рускиот министер за одбрана Сергеј Шојгу неодамна имаше телефонски разговори со министрите за одбрана на Турција, Франција, Велика Британија и САД. Тој им ја пренел на колегите својата загриженост „за можната провокација на Украина” и можната украинска употреба на „валкана” бомба на нејзина територија со цел да ја обвини Русија за тој напад.
Украина и западните земји ова го гледаат како закана од Русија, за која постои сомневање дека може сама да искористи „валканата бомба” под тој изговор.
Радиолошка бомба или „валкана бомба” се состои од конвенционален експлозив опкружен со радиоактивни материјали кои се шират во моментот на експлозијата.