„ПО МИЈАЛКОВ, АХМЕТИ СИ ГО СПАСИ И ГРУЕВСКИ ОД ЗАТВОР“ Вреди ја обвини ДУИ дека е убиец на правдата

Со директната интервенција на ДУИ во измените на Кривичниот законик, на Никола Груевски, поранешниот премиер и омилен политичар на Али Ахмети, му застаре уште една затворска казна. Ова е уште една шајка на Ахмети во ковчегот на неправдата која ја инсталираше неговиот режим 22 години, обвини денеска коалицијата Вреди откако медиумите објавија дека на 4 октомври му застарува двегодишната казна затвпр за предметот „Тенк“ за набавка на луксузниот владин мерцедес.

„После срамната спогодба на „Абазиското“ Обвинителство со Иџет Мемети, ова криминализирано раководство издејствува уште една амнестија. Ова фијаско на фаулираниот правен систем е уште една потврда за вирусот на Ахмети инсталиран во правосудството со години, каде што нивните моќници изградија заштитен ѕид околу себе, спасувајќи се меѓусебно од правосудна одговорност. Ова не е прв пат кога ДУИ, предводена од Али Ахмети, интервенира за да ги спаси своите пријатели од затвор. Претходно, истата игра ја одиграа и за архитектот на маките на Албанците, поранешниот директор на УБК, Сашо Мијалков“, обвинува владејачката Вреди во соопштението.

Партијата ДУИ, наведува Вреди, која две децении го манипулира народот со ветувања за реформи и европски интеграции, е убиец на секоја надеж за правда и подобра иднина.

„Сите знаат за притисокот на Артан Груби врз претседателката на Врховниот суд за оживување на аболициите на Ѓорге Иванов, наводно за да изврши притисок врз ВМРО-ДПМНЕ за усвојување на уставните измени. Време е граѓаните на оваа земја еднаш засекогаш да разберат: ДУИ никогаш не била за големиот европски сон, туку нејзин саботер. Наместо да се борат за правда и просперитет, тие се бореа само за да ги заштитат своите криминални кланови, без разлика на етничката припадност“, соопшти Вреди.