ПЛАТИТЕ ВО ФЗО ЌЕ ОСТАНАТ ИСТИ ДО 31 МАЈ Ќе прекине ли штрајкот?

В.д. директорот на Фондот за здравствено осигурување (ФЗО) Асаф Абдурамани вечерва, на својот фејсбук профил, соопшти дека е донесена одлука платите на вработените во ФЗО да останат исти до 31 мај.

Вработените во ФЗО бараа платите годинава да им бидат во висина на декемвриската плата од 2023 година, со утврденото зголемување од 15 отсто. Тие од вчера стапија во штрајк, изразувајќи незадоволство од можното намалување на платите за 21 отсто.

„Почитувани колеги, соработници на Фондот за здравствено осигурување, денеска со премиерот Талат Џафери донесовме заедничка одлука за еднаква вредност на платите до 31 мај 2024 година. Оваа одлука ќе трае до трајното решение кое секогаш ќе биде во корист на вработените. Му благодариме на премиерот Џафери и на владиниот кабинет за стручната поддршка за надминување на овој проблем“, напиша Абдурамани.

Овие два дена на шалтерите на фондот, работеше по еден вработен и примаше документи само за итни случаи.